Madre Yvonne Reungoat, tan notísia barak ne’ebé mai husi parte oioin mundu nian iha ne’ebé dame hetan ameasa, haruka mensajen ida ne’e ba inspetoria hotu.

 

«Irmán doben sira,
ha’u mai atu halo proposta ida ba imi, ho fiar katak nia sei hetan imi-nia adezaun. Iha parte hotu mundu nian, dala barak iha nivel Konferénsia episkopál nian, sira indika loron orasaun nian ba ema ne’ebé hetan persegisaun tanba motivu relijiozu, no, enjerál, ba dame iha mundu.

Ho violénsia ne’ebé nakfera iha fatin barak, ita labele nonook. Ita sai ida de’it ho Papa Francisco, no Bispu wain, amlulik no relijiozu, sarani simples sira nia lian.

Ita hatene katak iha sentru funu barak no ita asiste ba escalation ida intoleránsia, persegisaun, krueldade nian.Vítima sira ba vilolénsia lahó sentidu ne’e mak dalabarak sivíl sira, ho modu partikulár feto sira no labarik sira. Ita hakarak hela iha sira nia sorin, halo sira rona ita-nia lian. Liuliu ita-nia orasaun, akompaña ho estilu ida moris nian iha sinál komuñaun nian, solidariedade nian, no sasin evanjéliku boot liután.

Hamutuk ho irmán sira Konsellu nian, ha’u propoin atu loron 15 Agostu sai loron orasaun no adorasaun nian iha Institutu tomak ba dame iha país sira ho funu, liuliu iha Médio Oriente. Halo nune’e, ita sai ida ho inisiativa wain iha mundu hodi ativa tulun dahuluk no fundamentál, ida espirituál.

Ha’u husu imi atu envolve iha inisiativa, komunidade edukativa sira, ho modu partikulár foin-sa’e feto no mane sira, grupu sira Família Saleziana nian ne’ebé soi nu’udar referénsia komunidade Filhas de Maria Auxiliadora, ema sira husi fatin hela bá.

Dame mak uluknanai, Na’i nia don. Tanba ne’e ita uluknanai invoka nia ho orasaun. Maibé ita mós hakarak haka’as an atu halo asaun sira dame nian, atu sai ema dame nian, hodi eduka ita-nia an no eduka ba relasaun sira ne’ebé manifesta iha komunidade no iha misaun ne’ebé entrega mai ita.

Dezánimu, pesimizmu mak inimigu dame nian. Soin folin liu dame nian, maski don Maromak nian, konfia ba ema fraku sira nia liman, Tanba ne’e, maski ita la haree kedas rezultadu, ita hatene katak haka’as an ba dame, eduka ba dame, halo jestu sira dame nian, harii kontestu umanu ida ne’ebé respeita liután ema hotu nia dignidade. Ho forma ne’e ita tau tijolu sira dame nian. Ita hakarak to’o atu harii uma ida ba família umana iha-ne’ebé ema hotu sente simun no moris iha dignidade no seguransa.

Maria Ausiliadora, Liurai-Feto dame nian, tulun ita harii nia, iha fatin ne’ebé de’it ita horik bá, iha buat hotu ita halo. No Don Bosco, ne’ebé ita prepara an atu hahú tinan bisentenáriu selebrasaun sira-nian, tau iha ita-nia fuan ninia impulsu pastorál ho kbiit da mihi animas cetera tolle nian.

Ha’u kumprimenta imi ho domin boot no dala ida tan ha’u husu orasaun ida ba Kapítulu jerál ne’ebé sei mai».