Papa Francisco iha Angelus – 10 Agostu 2014

Maun no biin-alin sira, bondia!

Evanjellu ohin nian aprezenta mai ita epizódiu Jezús ne’ebé la’o iha bee-lihun nia leten (kf Mt 14,22-33). Liutiha multiplikasaun paun no ikan nian, Nia konvida dixípulu sira atu sa’e roo no ba uluk ba Nia iha sorin seluk, enkuantu Nia despede ema lubun-boot, no hafoin retira an mesmesak atu harohan iha foho to’o kalan boot. Iha bee-lihun mosu anin-boot, no iha anin-boot ne’e nia klaran mak Jezús to’o ba dixípulu sira nia roo, hodi la’o iha bee-lihun nia leten. Bainhira haree nia, dixípulu sira ta’uk, hanoin mate-klamar ida, maibé Nia halo sira hakmatek: «Aten-barani bá, ha’u mak ne’e, imi keta ta’uk!» (v. 27). Pedro, ho ninia impulsu típiku, husu ba nia kuaze prova ida: «Na’i, se Ita karik, haruka ha’u bá hasoru ita iha bee leten»; no Jezús dehan ba nia «Mai!» (vv. 28-29). Pedro tuun husi roo no hahú la’o iha bee leten; maibé anin boot baku nia no nia hahú mout. Nune’e nia hakilar: «Na’i, salva ha’u!» (v. 30), no Jezús lolo liman no dada sai nia.

Istória ne’e mak íkone furak apóstolu Pedro nia fiar nian. Iha Jezús nia lian ne’ebé dehan ba nia: «Mai!», nia rekoñese eko enkontru dahuluk iha bee-lihun hanesan, no kedas, dala ida tan, husik roo no bá hasoru Mestre. No nia la’o iha bee leten! Ita-nia resposta laran-metin nian no pronta ba Na’i nia bolun halo ita realiza buat estraordináriu sira. Maibé Jezús rasik dehan mai ita katak ita iha kbiit atu halo milagre ho ita-nia fiar, fiar iha Nia, fiar iha Ninia liafuan, fiar iha Ninia lian. Pedro fali hahú mout iha momentu nia sees nia matan husi Jezús no husik atu adversidade ne’ebé hale’u nia preokupa nia. Maibé Na’i nafatin iha ne’ebá, no bainhira Pedro bolu Nia, Jezús salva nia husi perigu. Iha personajen Pedro nian, ho ninia impulsu sira no ninia frakeza sira, hatudu sai ita-nia fiar: frajil nafatin no kiak, la hakmatek maibé manán, sarani nia fiar la’o bá hasoru Na’i moris-hi’as, iha anin-boot no perigu mundu nian nia leet.

Importante liu sena finál mós. «Sa’e tiha ba roo laran, anin para. Sira ne’ebé iha roo laran hakneak iha Nia oin, hodi dehan: “Tebes duni, Ita Maromak nia Oan!» (vv. 32-33). Iha roo laran iha dixípulu hotu, sira hotu hanesan iha esperiénsia frakeza nian, laran rua-rua nian, ta’uk nian, «fiar ki’ik nian». Maibé bainhira Jezús sae iha roo ne’e nia laran, troka kedas klima: sira hotu sai ida de’it iha fiar iha Nia. Hotu-hotu ki’ik no ta’uk, sai boot iha momentu ne’ebé sira tuku tuur no rekoñese iha sira-nia Mestre Maromak nia Oan. Dala hira mak akontese hanesan mós ho ita! Lahó Jezús, dook husi Jezús, ita sente ta’uk no la iha kbiit to’o pontu atu hanoin katak ita labele. Kuran fiar! Maibé Jezús nafatin ho ita, haksumik karik, maibé prezente no prontu atu tahan ita.

Ne’e mak ilas efikás Kreda nian: roo ida ne’ebé tenke enfrenta anin-boot no dalaruma to’o pontu atu taka-fila. Buat ne’ebé salva nia la’ós nia emar sira nia kualidade no aten-barani, maibé fiar, ne’ebé halo nia la’o maski iha nakukun laran mós, iha difikuldade sira nia leet. Fiar fó seguransa mai ita kona-ba Jezús nia prezensa ne’ebé besik nafatin, kona-ba nia liman ne’ebé kaer metin ita atu hasai ita husi perigu. Ita hotu horik iha roo ne’e nia laran, no iha ne’e ita sente seguru maski ita iha ita-nia limite no frakeza sira. Ita seguru liuliu bainhira ita hatene tau an hakneak no adora Jezús, Na’i ida mesak ita-nia moris nian. Ita-nia Inan, Na’i-Feto fó hanoin nafatin ita kona-ba ne’e. Ba nia ita harohan ho laran-metin.