Selebra solenidade Maria Auxiliadora ho Família Saleziana Venilale
Venilale – Iha loron 25 Maiu, komunidade 3 FMA no SDB ne’ebé iha Venilale, selebra ita inan Maria Auxiliadora dos Cristãos nia festa, hodi halo almoço confraternisação no halo konviviu hodi fo onra ba ita Nain Feto husi drama no kanta ne’ebé furak tebes ; Komunidade Madre Mazzarello halo drama kona ba Don Bosco nia mehi ba Koluna 2: Nain Feto no Jesus Eukaristia ho lian Italiano ne’ebé fó hanoin fali mai ita atu haburas kontinua ita nia domin ba Kreda hodi reza no obedese nafatin ba Amu Papa no majisteriu Kreda nian, hafoin sira remata sira nia drama ho dansa ida; komunidade Maria Auxiliadora mos hatudu drama ho titulu “L’opera di Maria Ausiliatrice” ne’ebé ko’alia kona ba Don Bosco nia mehi ba ai-hun1 maibé iha ninia fuan espesie 3 no taka ho kanta “Guida di Don Bosco”, no ikus komunidade SDB Beato Filipe Rinaldi mos hananu knananuk “Ave Maria” ne’ebé pe. Jacinto Tadeu, sdb mak inventa no iha tempu hanesan komprimenta padre Olivio ne’ebé selebra ninia tinan moris nian.
Molok remata festa, madre Cecilia Del Mundo agradese ba padre SDB sira , frater sira, madre sira husi komunidade 2 no menina sira ne’ebé halibur hamutuk hodi selebra festa ida ho ksolok no fraternidade hodi selebra Nain Feto nia festa maske udan, madre hateten ita fiar no laran metin nafatin katak buat hotu ne’ebé ita halo Nain Feto marka nafatin Ninia prezensa iha ita nia komunidade no misaun, ita husu Nia atu kontinua haraik bensaun wain ba ita atu kontinua ita nia moris nu’udar Salesiano/a hodi halo diak barak ba labarik no foin-sa’e sira ne’ebé Maria entrega mai ita ida-idak. Ikus nian madre Cecilia fahe imajen Nain Feto no medalla ba ema ida-idak nu’udar rekordasaun.
Hafoin iha tuku 06.00, misa hamutuk iha parokia ho familia Salesiana no sarani sira, misa ne’e preside husi padre Olivio da Costa,sdb no ko-selebrante nain haat.
Iha omilia amu Olivio hateten: fulan maio mak fulan ne’ebé Santa Kreda dedika ba Nain Feto Maria. Nu’udar familia salesiana fulan ida ne’e mos importante atu hanoin ita Nain feto ho titulu Virgem Maria Auxiliadora”. Durante ne’e Kreda universal, ita nia Santo Padre konvida ita atu reza tersu loron-loron hodi husu intervensaun Nain Feto nian ba krize pandemia mundial. Iha nível kongregasaun Reitor Mor mos konvida ita hotu halo Novena Extraordinária ba ita Inan Nain Feto Maria Auxiliadora ba intensaun ne’ebé hanesan.
Padre mos iha ninia reflesaun fahe pontu importante 3 ne’ebé bele tulun ita atu hanoin kona ba Nain Feto:
- Komuñaun: ita nu’udar sarani ka religioso/a halibur hamutuk iha Maromak ida deit, ita simu batismu ida deit no ita iha fiar ida deit, ita hotu hala’o misaun ida deit iha familia bo’ot Salesiana, iha karisma no Espiritu Don bosco nian.
- Maria mak ita Inan no ita nia modelu nu’udar disipulu: ita hateke ba Maria hsodi husu ba ita an rasik “ oinsa ha’u bele sai Jesus nia disipulu ne’ebé los hanesan Maria ne’ebé ho fidelidade tuir Jesus to’o rohan?
- Devosaun no imitasaun: nu’udar sarani liu-liu Don Bosco nia oan sira ita mos buka imita tuir ninia ezemplu hodi laran metin nafatin ba Nain Feto.
Obrigada barak!
Cesarina Correia, Fma
