Katekeze ho Papa Francisco – 6 Agostu 2014

Roma – Papa Francisco hahú fali iha kuarta 6 Agostu, audiénsia jerál ho sarani  sira. Liutiha deskansu fulan ida nian, Amu-Papa simu ema rihun ba rihun iha Sala Paulo VI no evidensia karakterístika sira Maromak nia Povu nian, hodi destaka nesesidade atu tuir rahun-di’ak sira ne’ebé Jezús ko’alia iha Evanjellu Mateus nian.

Asesu Katekeze ho lia-portugés

Uluknanai, Papa Francisco fó hanoin katak Maromak nia povu funda iha Aliansa Foun nia leten, ne’ebé Na’i estabelese ho don nia moris nian. Nia mós resalta papél S. João Batista nian, ida-ne’ebé prepara dalan ba Na’i ne’ebé mai, hodi predispoin povu ba konversaun no atu simu Maromak nia konsolasaun.

“Ho ninia sasin, João indika mai ita Jezús, konvida ita atu tuir Nia no dehan mai ita, hodi la falun liafuan sira, katak ida-ne’e husu haraik-an, arrependimentu no konversaun”, Papa Francisco hatutan.

Amu-Papa fó hanoin kona-ba hanorin foun ne’ebé Jezús husik ho Rahun-Di’ak sira hodi konvida ema hotu atu repete ho nia, hodi grava iha sira-nia fuan sira. Nu’udar “kanaar”, nia rekomenda atu lee iha uma kapítulu 5 Evanjellu Mateus nian, ne’ebé fó sai  no dezenvolve Rahun-Di’ak sira.

“Iha liafuan sira-ne’e ita hetan novidade tomak Kristu lori mai: rahun-di’ak sira mak Jezús nia retratu, Ninia modu moris nian; nia mak dalan ba ksolok loos. Jezús mós husik mai ita kritériu atu julga ita ema iha mundu nia rohan: ita sei hamutuk ho Nia iha moris rohan-laek se ita hatene, durante iha ita-nia moris iha rai, rekoñese Nia iha ema kiak, iha ema hamlaha, iha ema ne’ebé presiza, iha ema marjinalizadu, iha ema moras no makterus”.

Iha konkluzaun, Papa Francisco enfatiza katak Aliansa Foun mak loos duni hatene rekoñese katak Maromak hakohak umanidade ho ninia laran-sadia no kompaixaun iha Kristu. “Ida-ne’e mak hakonu ita-nia fuan ho ksolok, ne’ebé halo ita-nia moris sai sasin furak no kredivel Maromak nia domin nian ba maun no biin-alin sira hotu ne’ebé ita hasoru, loroloron”.

Ne’e mak dala uluk, iha ninia pontifikadu, Papa Francisco halo katekeze iha Sala Paulo VI. Lokál ne’e iha ár kondisionadu, nune’e apropriadu liu atu simu sarani sira iha tempu bailoron Europa nian.

Durante katekeze Amu-Papa husu orasaun ba Médio Oriente (funu) no ba Xina (rai-nakdoko). No molok fó bensan finál, Papa Francisco dedika liafuan ruma ba Maromak nia Atan Paulo VI, iha aniversáriu ninia mate nian iha 6 Agostu 1978, “fiél servidór Kristu no Evanjellu nian”.