Mensajen Ir. Yvonne Reungoat ba FMA hotu iha mundu (5 Agostu 2014)

«Irmán doben sira,

ha’u mai hasoru imi iha loron ne’ebé ita selebra aniversáriu fundasaun Institutu nian, akontese tinan 142 liubá.  Iha tinan ne’e festa asume ton ho intensidade boot liután, tanba nia mai uluk loron ruma inísiu tinan Bisentenáriu Don Bosco nia moris nian, ita-nia Institutu nia Fundadór hamutuk ho Madre Mazzarello.  Loron 5 Agostu, mai ita, mak hanesan odamatan ida ne’ebé loke ba selebrasaun sira tinan ne’e nian, nu’udar etapa nabilan ida grasa no hahí nian ba Maromak.

 

Selebrasaun ohin nian lori fali mai ita nia hanoin Don Bosco nia diskursu ba irmán FMA profesa dahuluk sira. Ha’u konvida imi atu lee hikas testu: nia sei ko’alia mai ita ho modu foun kona-ba Fundadór nia mehi ba ita-nia Institutu.

 

Husi Don Bosco nia liafuan, haktuir iha sirkunstánsia ne’ebá, ita bele komprende ninia ideia orijinál bainhira fó moris ba Família relijioza foun iha Kreda.
Ita husik atu ita-nia fuan haksoit ho gratidaun ba Maromak tan fó ba Kreda, ba Kongregasaun Saleziana, ba ita-nia Institutu no Família Saleziana tomak, Aman Fundadór Santu ida.  Karizma ne’ebé Espíritu Santu entrega ba nia sei hamosu simpatia no admirasaun ohin mós iha parte hotu, iha ema sira ne’ebé pertense ba konfisaun relijioza seluk mós, hanesan hatudu ho urna nia pasajen.
Ami hakarak mós agradese diretamente Don Bosco tanba nia simu Maromak no Maria Tulun-Na’in nia bolun atu funda ita-nia Institutu no tanba asume ho korajen kolen tomak ne’ebé fundasaun ne’e komporta. Nia hatene rekoñese iha Maria Domenica Mazzarello fini santidade nian prezente iha nia no manifesta, iha relasaun ho nia, konfiansa lahó limite.  Husi enkontru espirituál entre ita-nia santu Fundadór/a natubu komuñaun karizmátika boot. 
Ha’u hanoin katak selebrasaun di’ak liu ba eventu bisentenáriu mak simu apelu atu hafoun fidelidade ba identidade karizmátika Institutu nian, iha nivel pesoál nune’e mós komunitáriu, to’o pontu sai espresaun agradesimentu Don Boso nian ba Maria Ausiliadora.  Maria mak uma ba umanidade.  Hodi hateke ba Nia, ita bele sai, hamutuk ho foin-sa’e sira, uma ne’ebé evanjeliza no halo sai tebtebes iha ita-nia moris, liafuan sira: Ne’e mak ha’u-nia uma, husi ne’e sei sai ha’u-nia glória.
Ha’u dezeja atu tinan ne’e marka ba hotu kompromisu fidelidade boot liután ba Maromak no ba misaun edukativa, liuhusi prezensa ida intensa no reál liután iha foin-sa’e sira nia leet, liuliu sira ne’ebé kiak liu.  Kompromisu ne’ebé hafoun liuhusi misaun sei sai espresaun ita-nia rekoñesimentu ba Maromak no ba Don Bosco, iha klima Kapítulu Jerál XXIII, tempu grasa no renovasaun nian. Foin-sa’e feto no mane sira mundu tomak nian hakarak hetan iha ita Filhas de Maria Auxiliadora ne’ebé la’o iha sira-nia sorin iha dalan ba santidade saleziana.

Iha sirkulár n. 947, ami halo konvite atu moris KJ XXIII nu’udar oportunidade signifikativa atu avalia ita-nia fidelidade ba Don Bosco, hodi husu atu reflete se ita realiza ninia mehi no interroga ita-nia an kona-ba sá mak ita bele halo atu halo nabilan ohin Monumentu moris agradesimentu nian ba Ausiliadora, ne’ebé nia hanoin bainhira funda ita-nia Família relijioza.  Obrigada ba Maria, ne’ebé hafoun nafatin, husu atu ita sai ho Nia, feto Magnificat nian!

Iha Institutu atualmente iha Inspetoria 4 no komunidade 82 ne’ebé sira-nia Patronu espesiál mak Don Bosco.  Ha’u hakarak atu ita bele selebra bisentenáriu ho atensaun espesiál iha realidade sira-ne’e hodi envolve númeru aas liután ema sira-nian no hodi intensifika orasaun ba vokasaun sira.  Ohin loron mós Don Bosco kontinua dada jerasaun foun sira no hakarak partilla ho sira ninia mehi no ninia misaun. Ha’u hakarak atu, la’ós de’it iha komunidade sira-ne’e, maibé iha komunidade edukativa hotu mundu salezianu nian  espíritu Don Bosco nian, sintetiza iha lema da mihi animas cetera tolle no iha Sistema Preventivu, hetan kolaboradór sira, kolaboradora sira matan moris atu atua nia iha tempu ohin. 
Ba ha’u parese importante, atu agradese ida-ne’ebé reprezenta ho moris Don Bosco, nu’udar ninia Susesór da-10: Reitór-Mor, Pe. Ángel Fernández Artime.  Iha kontinuasaun ho Pe. Pascual Chávez Villanueva ne’ebé presede nia iha misaun ne’e, nia husu Família Saleziana tomak atu moris nu’udar Don Bosco, ho foin-sa’e sira no ba foin-sa’e sira, atu asume ho modu vitál ninia eransa espirituál, atu kultiva fuan pastorál ida atu bá hasoru foin-sa’e sira, liuliu sira ne’ebé kiak liu.
Iha ótika ne’e, hamutuk ho Salezianu sira, bele reflete iha tinan tomak kona-ba oinsá ita bele hakle’an espiritualidade juveníl saleziana no oinsá lansa fali, hamutuk ho foin-sa’e sira, ba foin-sa’e sira seluk.  Ha’u konvida imi atu fanun an ba kriatividade atu avalia oinsá asume, ho konxiénsia,Don Bosco nia eransa karizmátika ohin, hodi define ain-hakat konkretu no komunika mai ami inisiativa sira.
Maria Ausiliadora, kolaboradora Espíritu Santu nian hodi hamosu karizma salezianu, tulun ita no akompaña ita iha dalan!  Nia haraik bensan ba ita-nia Institutu no ba Família Saleziana tomak, ba komunidades edukativa sira no, iha sira, foin-sa’e sira, Don Bosco nia fuan nia doben sira.  Ita agradese Nia, tanba ita iha serteza katak nia pasiar nafatin iha ita-nia uma ida-idak.

Ha’u dezeja ba imi hotu festa furak loron 5 Agostu nian: husi Mornese ha’u sente ida de’it ho modu partikulár ho imi.
Ha’u kumprimenta imi ho domin boot no agradese irmán hotu ne’ebé haruka mai ha’u  sira-nia votu sira ba okaziaun ida-ne’e».