Dili – Inspetoria FMA Timor-Indonesia haksolok iha loron fundasaun Institutu FMA, 5 Agostu, tanba iha loron ne’e, irmán foin-sa’e na’in haat halo sira nia votus relijiozu ba dala uluk hodi saran sira-nia moris ba Maromak. Tuir konstituisaun FMA ”atu hetan admisaun ba profisaun relijioza, novisa tenke komprende didi’ak nia esénsia no valór, no iha maturidade ne’ebé presiza atu deside ho hakaran rasik no loos atu saran-an ba Na’i hodi asume ho responsabilidade obrigasaun hotu mai husi vokasaun nu’udar Filhas de Maria Auxiliadora” (Konst.94).

Irmán Cherly Marlina Moreira da Silva, Ir Honoria Santos, Ir Maria Natalina de Jesus da Costa no Ir Martinha Gomes, depoizde tinan rua novisiadu, sira hakotu lia atu fó an tomak ba Na’i no  maski profisaun ho votu temporáriu halo “ad annum” iha tinan haat nia laran, hafoin ba tinan rua, mak sei halo profisaun perpétua, maibé sira hakarak metin iha fidelidade, no husu maluk hotu atu suporta nafatin sira iha orasaun no domin.

Padre Apolinário Neto SDB nu’udar vigáriu provinsiál mak selebrante prinsipál no akompaña husi amlulik salezianu na’in lima seluk hanesan padre Agung, padre Agostinho, padre Mário do Rosário, padre Hermenigildo no padre Rui Gomes. Iha ninia omilia, padre Apolinário uluknanai nia agradese Maromak ba don vokasaun nian. Nia salienta katak ho batizmu “Maromak bolu ema hotu ba santidade, nu’udar objetivu prinsipál moris nian” no ida-ne’e hahú iha família laran, nu’udar Kreda doméstika. Komenta fraze Evanjellu João ne’ebé sai lema ba sira “Ha’u mak uvas-hun no imi sanak sira”, nia dehan, ida-ne’e mak espiritualidade sarani nian no saleziana, atu horik iha Na’i, uvas-hun, sai sanak atu haklaken Nia. Nia husu ba irmán sira atu “esperimenta komuñaun kle’an ho Jezús, iha komunidade, atu aprende husi Nia no ikusmai  halo hanesan Jezús, hatudu no haklaken Nia ba foin-sa’e sira”.

Ir Paola Battagliola mós konvida prezente hotu atu kontinua suporta sira ho orasaun no hato’o liafuan espesiál ba sira:

“Doben irmán Cherly, ir Honoria, ir Martinha no ir Maria Natalina, ó to’o iha primeira profisaun no Institutu simu ó ho ksolok boot!

Ó simu  rikusoin folin boot vokasaun nian. Maibé hanoin bá katak, ó lori nia iha sanan-rai nia laran, atu kbiit maka’as bele mosu husi Maromak iha ó (kf 2 Cor 4,7).

Atu ksolok pertense tomak ba Jezús, iha komunidade ida ne’ebé da mihi animas cetera tolle mak anima, nabilan iha ó-nia moris no halo ó uma ba foin-sa’e sira hotu ne’ebé Providénsia entrega ba ó. Atu ó sai ba sira, sinál kredivel no dalan ne’ebé lori ba Na’i, nune’e hodi sente Na’i ne’ebé dada sira no, nakonu ho espantu/admirasaun, foin-sa’e sira hili buat ne’ebé furak no di’ak.

Atu ó-nia fidelidade iha ksolok, hafoun loroloron iha Eukaristia, kbiit ne’ebé boot liu evanjelizasaun nian, hanoin nafatin bá, Papa Francisco nia liafuan sira: “Imi keta sai mane no feto sira ne’ebé triste: sarani ida nunka bele sai triste! Ita keta husik dezánimu hatuun ita! Ita-nia ksolok la’ós ksolok ida ne’ebé moris husi soi sasán wain, maibé moris husi enkontru ho Ema ida: Jezús”.

Maria, Inan no Tulun-Na’in, akompaña ó no haraik bensan ba ó ho ninia ternura.

Ho nia, loron ba loron ó harii ó-nia dalan fidelidade nian”.

Ikusnian, irmán foun na’in haat aleinde agradese Maromak ba sira-nia vokasaun, sira mós agradese Institutu, agradese formadór/a sira no inan-aman, agradese mós komunidade Divina Providénsia ne’ebé prepara fatin no aihan ba festa ne’e.