FESTA MADRE MAZZARELLO

DILI – Iha  loron 13, Maio mak loron ksolok no gratidaun nian  husi FMA ida-idak, liu-liu ami sira ne’ebe hela iha komunidade sira Zona Dili parte Oeste-Komoro, tamba selebra hamutuk Festa Co-Fundadora Madre Mazzarello nian. Iha okaziaun furak ne’e, ami hahu loron espesial ne’e ho orasaun dader  no Misa solene. Iha loraik ami asiste drama Madre Mazzarello nian ne’ebe prepara husi Me. Maria Letizia ho Irman no Novisa sira. Drama ne’e dedika espesial ba Me. Maria Assunta Sumiko Yione, FMA, ne’ebe halo vizita iha Timor no iha momentu kmanek ida ne’e bele selebra Festa Madre Mazzarello ho ami. Hotu tiha asiste drama kontinua ho merenda hamutuk no reza tersu animadu ne’ebe Irman sira husi Komunidade Beata Eusebia Palomino.

Iha tersu animadu ne’e halo ami hakarak hamoris fila fali momentu signifikativo ne’ebe permete mai ami atu kontempla Nain Feto nia prezensa, Inan Tulun Nain ne’ebe halo tiha ona buat hotu iha Madre Mazzarello nia moris. Hateke hanesan Madre Mazzarello ne’ebe nakonu ho korajen iha nia moris: korazen atu lao, korazen atu rona no korazen atu hela iha Nai tan foin sae sira. Iha momentu ida-idak orasaun tersu ida ne’e ami kontempla kona Misterio Gloriozu nian no halo relasaun ho fatin signifikativu sira iha Madre Mazzarello nia moris. Hanesan: misterio dahuluk hare Jesus Nia moris Hias, kontempla fatin Borgoalto ne’ebe fo hanoin kona ba Me. Mazzarello nia korazen atu rona. Iha loron ida, nia lao iha laletek Borgoalto nian, derepente mosu iha nia oin vizaun ida, nia hare hanesan kolejiu ida ho foinsae feto lubuk ida no nia rona lian ne’ebe dehan ba nia “Hau entrega sira ba O”. Basa Kristu la haruka ha’u atu sarani maibe atu haklaken evanjeliu, no la’os ho matenek ema nia liafuan nian, nune’e Kristu nia krus la bele sai folin laek. (1 Kor. 1:17). Iha Misteriu Jesus sae ba Lalehan, kontempla kona ba fatin Valponasca ne’ebe hare Me. Mazzarello  nia korazen atu hela, iha tempu hela mesak halo nia dekobre buat furak barak iha nia moris nune’e nia dehan: “Aifunan  furak liu ne’ebe bele fo ksolok ba Nain Feto iha fulan ne’ebe dedika ba Nia mak renova-an iha espiritu hanesan ho aihun sira iha tempu primavera nian” (Cron II 132). Husik tiha imi nia moris tuan nian, ne’ebe aat tamba halo tuir hakarak aat sira. Hafoun imi nia laran ho espiritu no simu tiha ema foun, nebe moris mai tuir Maromak nia ilas iha justisa no santidade lialos nian. (Ef. 4: 22-24). Iha Misterio Espiritu Santu tun ba Apostolo sira iha Senaklu, kontempla kona ba fatin Pozzo koalia kona ba korazen atu hasoru. Posu halo ita hanoin kona ba Be’e. “Se mak hemu be nebe Ha’u sei fo sei la hamrook ba nafatin, maibe be nebe Ha’u fo ba nia sei sai nudar bematan nebe suli ba moris rohan laek iha nia laran”.(Jo.  4:14). Iha Misterio Nain Feto Sae ba Lalehan, kontempla kona ba kolejiu ne’ebe fo hanoin kona ba korazen atu akompaña. Me. Mazzarello nia fuan pronto atu husik Nain Feto hanesan superior iha Komunidade. Ha’u klamar hahi Na’i, ha’u neon haksolok iha Maromak ha’u Maksoin. Basa Nia hare nia atan feto nebe folin laek. Tebes duni, houri ohin ba oin, Ema hotu sei dehan ha’u rahun diak. (Luk. 1:46-48). Iha misterio Nain Feto simu Gloria bo’ot Iha lalehan, kontempla kona ba fatin Nizza Monferato hanoin fali ba Me. Mazzarello nia korazen atu lao. “Aten brani ba imi hotu irman doben no diak sira. Ita buka halo diak bainhira ita sei iha tempu. Lalika neon betek ba difikuldade naran deit ne’ebe imi hasoru. Dehan nafatin: Jesus tenke sai ita nia kbit tomak. Ho Jesus naha sira sei sai kman, kole sira ma’as, tarak sira sei nakfilak ba dian. Maibe kuidadu, rona, atu manan an rasik, selae buat hotu sei todan no hahalok a’at sei mosu fali iha ita nia fuan hanesan kanek nia tasak” ( MM.L. 37). Ikus mai, maun alin sira, imi hatene ona housi ami oin sai imi sei moris atu monu los ba Maromak nia laran. Los duni, imi moris ona hanesan ne’e. Ohin, iha Na’i Jesus Kristu nia naran, ami husu imi atu moris diak liu tan. Basa imi hatene doutrina nebe ami fo ba imi hodi Na’i Jesus Kristu nia kbiit. Maromak hakarak katak imi sei sai santu no mos teb-tebes housi sala foer (1 Tes. 4:1-3).

 

Reflesaun sira ne’e tulun ami atu halo empeñu ba ami ida-idak nia moris iha Festa Inan doben nian ne’e. Me. Mazzarello harohan mai ami atu sai laran manas nafatin hanesan ita iha ami nia moris loro-loron nian. Buona Festa ba ita hotu. Santa Maria Domingas Mazzarello, Harohan mai ami.

Obrigada barak

 

(Noemia de Deus FMA)