Selebrasaun resesaun novisa foun 2014

Dili – Formasaun iha vida konsagrada mak formasaun ida ba moris tomak, hahú ho formasaun inisiál. Períodu novisiadu inklui iha períodu inisiál no novisiadu mak  inisiasaun loloos ba vida relijioza. Iha tinan rua nia laran irmán sira hahú moris tuir Don Bosco no Madre Mazzarello nia espíritu, husik sira-nia an forma atu to’o ba konfigurasaun ho Kristu. Iha períodu ne’e, sira sei konfronta an ho Maromak nia Liafuan, estuda no moris tuir didi’ak Konstituisaun FMA nian, hodi haka’as loroloron iha haluha an rasik, integra serbisu no orasaun, hakle’an ezijénsia sira Sequela Christi nian tuir vokasaun saleziana, hodi moris iha komunidade nu’udar biin-alin, ho esperiénsia apostólika no loke an ba misaun”.

 

Foin-sa’e na’in haat ne’ebé ohin, 4 Agostu 2014, simu medalla novisa nian husi irmán Paola Battagliola, provinsiál FMA TIN mak: Mariana Freitas, Maria Sarmento, Umbelina Fraga no Olviana InaKi, hahú sira-nia formasaun nu’udar novisa. Sira hili nu’udar lema ba sira-nia dalan novisiadu Jezús nia liafuan ne’ebé dehan: “Aprende husi Ha’u, tan Ha’u laran kmaus no haraik An” (Mt 11,29).

Irmán Paola Battagliola iha ninia liafuan ba sira rekomenda atu tama iha Kristu nia eskola, hakbesik ba nia ho frakeza sira hotu, todan sira, hamamuk an atu, “husik Maromak mak gia no hakonu ita ho Ninia domin”, liuhusi “mestra  no komunidade”.

Tuirmai ne’e mensajen husi Ir Paola ba novisa sira:

“Doben novisa sira,

Institutu tomak, ne’ebé haka’as an iha tempu ne’e iha knaar prioritáriu atu harii nia an no harii ho foin-sa’e sira “uma ne’ebé evanjeliza” agradese Na’i ho ksolok ba ó-nia entrada iha Novisiadu.

Imi nia prezensa, novisa doben sira, mak don ida ne’ebé hafoun beleza Institutu nian no freskura karizma nian ba ema hotu. Imi hahú daudaun imi-nia novisiadu iha tinan ne’ebé loke Bisentenáriu Don Bosco nia moris nian no iha tempu preparasaun nian ba Kapítulu Jerál XXIII. Imi hatene ona katak tema mak “Sai ho foin-sae sira, UMA ne’ebé evanjeliza”. Imi joven maibé imi halo ona opsaun ida moris nian no oras-ne’e imi hatudu vontade firme atu aprende moris nu’udar FMA, atu hakle’an ita-nia Konstituisaun sira, atu moris iha radikalidade sequela Christi nian hodi saran imi-nia moris ba foin-sa’e sira to’o dada-iis ikus, hanesan ita-nia Fundadór no Fundadora sira halo.

Durante períodu imi-nia novisiadu nian Espíritu Santu mak sei tulun imi, maibé iha mós mestra no komunidade, atu deskobre no asimila identidade FMA nian. Sai “Uma ne’ebé evanjeliza” hola parte ita-nia identidade ne’e!

Papa Francisco dehan ba joven sira no ohin dehan mós ba imi ida-idak: “Imi taru imi-nia moris ba ideál boot sira” … ideál boot sira mak ida Evanjellu nian ne’ebé ita simu bolun atu asimila, hodi nune’e, fó sasin ba foin-sa’e sira!

Ba imi, novisa doben sira ne’ebé ohin hahú esperiénsia furak ne’e, ha’u dezeja ba imi “buon cammino” marka ho prezensa materna Maria Ausiliadora nian ne’ebé hanorin imi dosilidade fuan no neon nian no, tempu hanesan, enkoraja imi atu “halo buat ne’ebé Nia hateten ba imi”.

Maromak haraik bensan ba imi no Don Bosco no Madre Mazzarello tulun imi atu sente ksolok hola-parte ba família relijioza ida pertense tomak ba Maria.“