Selebra hamutuk nu’udar FAMÍLIA SALEZIANA Santa Maria Mazzarello
Venilale – Ohin 13 Maiu, Komunidade Madre Mazzarello Venilale selebra festa Padroeira nian hamutuk ho komunidade FMA, SDB Venilale no mós ho reprezentante Komunidade Edukativa. Iha professora na’in tolu: Eufrásia,Teresinha no Maria Freitas no Pe. Arlindo Sequeira husi Dioseze Baucau. Festa tinan ida ne’e la hanesan tinan tinan iha ne’ebé hamutuk ho foinsa’e sira, tan situasaun ne’ebé ita hotu hatene.
Festa ida ne’e hahú ho Eukaristia Santa ne’ebé prezide husi Pe. Abrão Pinto SDB no Amu konselebrante nain 4 ho Pe. Arlindo Sequeira, Vigáriu diosezanu ba Assuntos Pastorais dioseze Baucau nian.
Iha omilia, Amu selebrante konvida ema hotu ne’ebé prezente atu kontempla imajen Madre Mazzarello nian. Sei tinan 15, nia konsagra ho modu privada nia virjindade ba Maromak. Iha uma to’os nian iha Valponasca nia hatudu sai nia domin boot ba Jezús Eukaristia: nia loron hahú tuku haat dadeer atu partisipa misa iha uma-kreda aldeia nian no tuku 7 nune’e nia fila fali ona ba uma atu halo serbisu todan iha to’os. Buat hotu la
’o normál entre serbisu iha to’os no empeñu sira grupu Imakulada nian, bainhira iha 1860, epidemia tifu nakfera. Iha “pandemia” ne’e mak nia deskobre Maromak nia planu. Don Bosco, iha paseiu ba Mornese, hasoru grupu Main no nia grupu. Don Bosco komprende kedas katak iha Main nia grupu nia hetan rekursu umanu sira atu hahú misaun ba menina sira nia edukasaun, hanesan Amu-Papa husu.
Amu selebrante foka liu iha Maria Mazzarello ninia halo dalan to’o ba santidade, ho fiar metin maski hasoru difikuldade. Nia rekoñese nia an la’ós ema perfeitu. Maibe’ nia husik Maromak serbisu iha nia, tan ne’e husik hela virtude umildade, simplisidade no ksolok. Ikus liu amu selebrante fó lia menon katak; Your life is not about you. Ó nia moris la’ós kona ba ó maibé kona ba Maromak. Iha mundu la’ós ita mak importante maibé Maromak, tan Nia mak fó grasa mai ita atu h
alo buat hirak ne’e.
Depoizde Missa konviviu hamutuk nu’udar familia ida. Komunidade Madre Mazzarello aprezenta drama kona-ba “Madre Mazzarello nia eskola suku nian”, ne’ebé hakarak dehan; Don Bosco no Madre Mazzarello nia misaun mak atu suku ka salva foinsae sira ne’ebé moris sai farrapu – naklees ba mai atu lori fali ba Maromak. Hafoin kanta ida husi komunidade Maria Auxiliadora no mos knananuk ida husi Reitór komunidade nian Pe. José de Sá.
Ikus liu dahur hamutuk hafoin fahe malu.
