Liturjia Domingu XIX Tempu Komún nia tema fundamentál mak Maromak nia revelasaun, Maromak ida prontu atu la’o hamutuk ho ema sira, iha dalan istória nian.

Leitura dahuluk konvida fiar-na’in sira atu fila fali ba orijen sira-nia fiar nian no sira-nia kompromisu nian, atu halo peregrinasaun ida bá hasoru Maromak komuñaun no Aliansa nian; no garante katak fiar-nain la hetan Maromak ne’e iha manifestasaun espetakulár sira, maibé iha simplisidade, iha interioridade.

Evanjellu aprezenta mai ita reflesaun ida kona-ba dalan istóriku dixípulu sira nian, ne’ebé Na’i haruka ba “tasi nia sorin seluk” atu propoin ba ema sira festa han-hemu Reinu nian. Iha “viajen” ne’e, komunidade Reinu nian la mesak, ho forsa sira mate nian ne’ebé ameasa sira: Jezús, Maromak domin no komuñaun nian bá hasoru dixípulu sira, lolo liman ba sira, haraik kbiit ba sira atu manán adversidade, deziluzaun, ostilidade mundu nian. Dixípulu sira simu konvite atu rekoñese Nia, simu Nia no aseita Nia nu’udar “Na’i”.

Leitura daruak sujere katak Maromak ne’ebé prontu atu hasoru ema sira no hatudu nia oin domin no laran-di’ak nian; Nia iha proposta ida salvasaun nian ne’ebé oferese ba ema hotu. Nia konvida ita atu matan moris ba manifestasaun sira Maromak ne’e nian no atu la lakon oportunidade salvasaun nian ne’ebé Nia oferese ba sira.

Download