Roma (Itália). Papa Francisco, iha finál Angelus domingu nian, lansa apelu ida tan ba dame: “Ita hanoin ba katak buat hotu lakon ho funu, buat ida la lakon ho dame”.

Reitór-Mor, Pe. Ángel Fernández Artime, hodi hatán ba apelu ne’e husu ba Família Saleziana atu sai ida iha esperansa no fiar: «ha’u husu atu ita sai ida de’it ba Santu Padre nia orasaun ne’e, atu ita harohan ho fiar loos, atu Na’i kona ita-nia fuan sira, no mós ema sira ne’ebé bele deside atu hakotu funu sira ne’ebé akontese iha momentu ne’e, no atu haraik mai ita don atu ita sai nafatin maklorik no harii-na’in Ninia dame nian».

Madre Jerál Filhas de Maria Auxiliadora nian, Ir. Yvonne Reungoat, hodi Institutu nia naran, hatán ba Reitór-Mor nia apelu ne’e hodi deklara ninia adezaun tomak ba pedidu dame nian ba mundu tomak:

«Pe. Ángel doben,

ha’u lee notísia ajénisa ANS nian iha ne’ebé ita husu ba Família Saleziana atu sai ida de’it ho Papa Francisco nia apelu ba dame.
Hodi Institutu nia naran, ne’ebé ha’u reprezenta, ha’u deklara ami-nia adezaun ba pedidu ne’e, ne’ebé to’o iha tempu hanesan ne’ebé hanoin hikas sentenáriu funu mundiál dahuluk. Papa Francisco nia liafuan iha Angelus domingu kotuk nalian maka’as iha ami-nia fuan.
«Imi para, halo favór» mak ami-nia liafuan mós, ami-nia dezeju, no hakarak tradús iha kompromisu konkretu ba dame iha mundu tomak.
Ami hanoin katak kolaborasaun dahuluk ba konstrusaun soin folin boot ne’e mak orasaun no moris ida komprometidu atu fó sasin kona-ba Maromak nia domin, ema hotu nia Aman, ne’ebé la ezklui ema ida husi festa moris no ksolok nian.
Ámbitu seluk kompromisu nian mak ida komuñaun iha komunidade. Espíritu tulun ita atu fó kualidade evanjélika ba ita-nia relasaun sira, halo ita sai sinál konvinsente no kredivel ukun-fuan foun ne’ebé Jezús husik mai ita nu’udar mandatu: «Imi hadomi malu hanesan Ha’u hadomi imi» (Jo 15,12).
Domin fiar buat hotu, hein buat hotu.  Domin mak liafuan ikus.
Aleinde ne’e, ami hakarak asume ho empeñu foun ami-nia misaun edukasaun nian ba jerasaun foin-sa’e sira. Ami konvensida katak  ita harii dame ho jestu ki’ik sira loroloron nian, hodi kuda pensamentu pozitivu sira, kuda respeitu ba dignidade no direitu/devér ema ida-idak nian, akollimentu diversidade nu’udar rikusoin, valór diálogu nian no kultura tomak nian.
Hodi husu don dame nian, ami-nia  hanoin dirije espesialmente ba labarik sira, joven sira, feto sira  nia terus: kategoria sira frajil liu no defende-laek nian.
Ami husu ba Na’i dame loos ida, dame ida ne’ebé dura, dame ida bazeia ba justisa, enkuantu ami asegura ami-nia solidariedade, ho modu partikulár iha ámbitu edukativu.
Ho FMA hotu mundu nian ha’u kumprimenta ita ho agradesimentu no afetu».