Irmán doben sira, foin-sa’e no membru sira komunidade edukativa nian,

 

Ha’u haksolok atu hakerek dala ida tan mensajen badak ida molok bá Roma iha-ne’ebé sei hala’o Kapítulu Jerál XXIII.

Ita labele la halo memória ba eventu boboot ita moris iha fulan ikus sira-ne’e…. no halo memória mak devér ida atu fó glória ba Maromak.

Ita hanoin ba kanonizasaun Amu-Papa boot na’in rua iha istória (João  XXIII no João Paulo II) no anúnsiu beatifikasaun Papa datoluk, Papa Paulo VI, loron 19 Outubru iha konkluzaun Sínodu família nian. Ita labele haluha lais de’it Papa Francisco nia viajen ba Terra Santa. Jestu sira iha enkontru oioin ho ulun-boot relijiozusu no ulun-boot Estadu sira nian no ho ema simples sira. Orasaun, enkontru sira, liafuan simples, kle’an, evanjélika ne’ebé ko’alia ba ema hotu nia fuan, hakat liu fiar la hanesan no kultura sira.

 

Iha nivel inspetoriál ita verifika daudaun dalan sira halo atu “sai ho foin-sa’e sira uma ne’ebé evanjeliza”. Dezafiu komún ida ne’ebé ita sente mak ida atu fó profundidade ba ita-nia vida espirituál no kualidade ba ita-nia relasaun sira.

Ita sente dezafiu hotu atu moris relasaun umanizante fraterna sira, vida família nian domin iha uma-laran. Dezafiu ida ne’ebé tenke lori ita ba ita-nia Fundadór/a sira, ba sira-nia istória, atu lee hikas sira-nia dalan fiar nian, sira-nia korajen atu bá hodi hakat liu , nune’e realiza Maromak ni mehi ba sira. Dezafiu ne;e lori hikas ita ba ita-nia vokasaun, ita-nia fidelidade no ita-nia komunidade sira nia transparénsia,atu fanun paixaun apostólika no nesesidade ba formasaun permanente ida ne’ebé nunka remata.

Mai ita halo ita-nia komunidade sira “uma Maromak nia domin nian”, uma ida iha-ne’ebé fekit “ksolok misionária”, komunidade ida ne’ebé “sai ba li’ur” no tau matan ba nesesidade sira ita-nia foin-sa’e feto no mane ohin loron nian. Entre nesesidade sira ne’e, ida-ne’ebé fundamentál liu mak nesesidade Maromak nian, hasoru Jezús no hetan ksolok loos.

Iha Mornese “mistika” moris hamutuk nian sai buras iha impulsu misionáriu, no ida-ne;e sai klima ida, ahi ida ne’ebé sunu no halekar nia roman no manas. Domin la tahan atu taka metin an….Ita moris daudaun oras ekleziál marka ho perspetiva “Kreda ne’ebé sai”. No Kapítulu mós tau ita iha liña ida-ne’e, liña misionária maka’as.

Nu’udar Institutu dimensaun misionária mak elementu esensiál ninia identidade nian (kf Konst. 75).

Iha surat konvokasaun ba Kapítulu Jerál XXIII ita lee: “Ita la haree ba misionariedade buat ruma aumenta tan ba atividade Institutu nian, maibé nia konstitui elementu esensiál ida: nia hetan biit husi ksolok vokasaun rasik nian no husi audásia apostólika.

Fiar, amizade ho Jezús, da mihi animas cetera tolle haburas sasin no ida-ne’e sai anúnsiu.

Madre no Irmán sira Konsellu nian iha sira-nia surat sirkulár konvida ita atu sai ida de’it iha orasaun atu selebra festa saleziana sira: 5 Agostu, atu hafoun gratidaun sai parte moris ba Famílai ida ne’ebé Mari arasik mak hakarak; 16 Agostu, ba abertura solene bisentenáriu Don Bosco nia moris nian.

Ita marka enkontru loron 5 Agostu atu hafounn ho ksolok ita-nia “sin” iha gratuidade no iha ksolok husi ida-ne’ebé hatene katak Maromak hadomi nia no  sente Maria Mestra fiar no moris nian akompaña nafatin.

Nu’udar Inspetoria, ita agradese Maromak ba don foin-sa’e na’in haat ne’ebé sei halo sira-nia profisaun dahuluk iha lorn 5 Agostu: Ir. De Jesus Da Costa M. Natalina , Ir. Gomes Martinha, Ir.Moreira da Silva Cherly Marlina, Ir. Santos Honoria,  no ira sai ida de’it ho knananuk Magnificat Ir. Jacinta  de Deus no Ir. Ligia Sarmentos ne’ebé iha loron 15 Agostu sei dehan sira-nia “sin” definitivu.

 

BUONA FESTA A TUTTE.

Hakohak ba imi,

Ir. Paola Battagliola