Retiru 2014

Venilale – Loron 20-26 Jullu 2014 mak tempu grasa nian ba Postulante nain 4 no Novisa tinan dahuluk na’in 5 ne’ebé halo hamutuk  sira nia Retiru iha Uma Maria Ausiliadora  iha  rai malirin Venilale.  Padre João Gaspar SDB  mak pregadór ne’ebé  fahe nia reflesaun no esperiénsia  kona-ba Maromak nia Domin.  Ideia sira ne’ebé esensiál no signifikativu liu kona-ba tema ida ne’e mak:

“Aman Maromak hadomi tebtebes  nia Oan  Jezús Kristu ne’ebe hatudu Nia Domin  ba Aman  hodi Nia  fidelidade ba Misaun ne’ebe Aman entrega ba Na. Espíritu Santu mak halo ita esperimenta Maromak nia Domin no hodi Nia ita bele hadomi Aman no Oan. no maluk sira hotu.”

“Ita nia kbiit no perseveransa mai husi Sakramentu domin rua e’e: Rekonsiliasaun no Eukaristia.”“ MARIA mak modelu karidade nian. Nia hanorin ita oinsá atu entrega ita nia an tomak ho domin ba Maromak. Wainhira ita hatan SIM , hanesan Nia,  ita pertense ona ba Maromak.”

Ir. Cecilia del Mundo  ne’ebé halo enkontru mós ho sira iha lokraik,  lori formande sira atu  reflete  kle’an liután Madre Mazzarello nia sabedoria fuan nian liu husi nia surat sira. Ba “buona notte” , nia  indika dalan ne’ebé konkretu liu oinsá atu moris domin laran-maus nian iha hanoin, hahalok no liafuan sira.

Durante Misa konkluziva, sira oferese sira nia surat domin nian ba Aman Maromak nu’udar resposta ba Aman Maromak nia Domin ne’ebé nafatin fiel, pasiente no gratuitu.

“Ha’u nia Aman doben, Aman domin Nain, ha’u agradese  ba Ita Boot ne’ebé kontinua nafatin akompanha ha’u iha ha’u nia moris ida ne’e. Ha’u sei empeña atu moris hodi aprende nafatin husi Jezús oinsá atu hadomi.  Transforma ha’u ho Ita Boot nia Domin atu ha’u bele fahe Domin ida ne’e ho ema seluk liu-liu ba labarik no foin-sa’e sira ne’ebé ha’u sei hasoru iha ha’u  nia misaun. Domin ida ne’e atu haburas , ha’u presiza :  atu fó tempu hodi rona Ita no  ko’alia  ho Ita beibeik   liuhusi Ita nia Liafuan sira.

Aman Santu, hori ohin ba oin, ha’u sei hatán  Sim ba Ita Boot  ho ha’u nia fuan tomak no ho liberdade.  Obrigada barak Aman doben”.