Dili – Ohin, 3 Maiu, Kreda iha mundo tomak selebra loron mundial ba vokasaun nian ba dala 57⁰ . Iha loron selebrasaun ba Vokasaun nian ne’e lori ita atu hanoin ba vokasaun ne’ebe ita ida-idak iha no vokasaun iha Kreda universal. Tamba vokasaun ida-idak moris husi hateken domin nian ho Maromak ne’ebe mai hasoru ita,  maski ita nia bero moris nian hasoru laloran bo’ot. “vokasaun liu fali ita nia hilin rasik, mak hatan ida ba Maromak Nia bolu ne’ebe ita la soi atu hetan”(Letters to Priet, 4 Agt 2019). Ita konsege hetan  no simu ita nia vokasaun wainhira ita loke ita nia fuan ho gratidaun no hare Maromak Nia dalan iha ita nia moris (mensajen St. Padre, loron Vokasaun).

Koalia kona ba vokasuan labele hare deit ba vokasaun sacerdotal ka vokasaun relijioza maibe vokasaun nu’udar kristaun no vokasaun ida-idak ne’ebe ema ida-idak iha. Buat ne’ebe hanetik ita nia dalan, haburas-an no ita nia hilin iha dalan ne’ebe Maromak  prepara mai ita mak “diabo sira” ne’ebe halo ita la hakmatek. Wainhira ita simu bolun atu husik fatin ne’ebe hakmatek no hasoru situasaun moris hanesan familia, sacerdote no moris relijioza. Ita nia reasaun dahuluk mak husi “diabu la fiar”. Hamosu iha ita esprsaun sira ne’e: Los duni, vokasaun ne’e laos ba hau! Ida ne’e mak hau nia dalan ne’ebe los? Maromak husu duni hau atu halo ida ne’e? Ita kria hanoin oi-oin atu hamate ita nia laran atu se’es  husi bolun ida ne’e. Ita presiza aten brani atu duni sai diabu ne’ebe halo servisu iha ita nia moris, fiar katak Maromak hatene buat hotu. Maromak sei tulun atu ita lao to’o rohan.

Iha ne’e novisa sira hato’o sira nia reflesaun kona ba loron ida ne’e, ne’ebe bazeia ba mensagen loron vokasaun nian husi Exortaun Christus Vivit 143: “Moris ba! Saran imi nia-an ba moris ne’ebe diak liu”.

Husi Nov. I Ano, Laura Pompeia: “Uluk nanain hau agradese ba Aman Maromak ba Don vokasaun ne’ebe haraik mai hau,, iha kongregasaun Salesiana. Hau agradese ba gras oi-oin ne’ebe hau esperimenta, hau haksolok iha dalan dalan  ne’ebe Maromak haraik mai hau, basa Nia bolu hau atu iha relasaun particular liu tan ho Nia. Durante hau nia jornada, hau aprende buat barak ne’ebe tulun hau iha moris spiritual no umana. Hau empeña-an atu halao knar lor-loron nian ho diak, nune’e bele sai  nia karan murak ida ba Nai. Tamba Maromak dehan: “Hau bolu o ho o nia naran, o  Hau nian”.(Is. 43,1)

Nov. Silvia Lemos dehan: “uluk  nanain hau agradese ba Maromak tan Nia  bolu hau iha dalan furak  no espesial ida ne’e, liu-liu iha vokasaun Salesiana. Agradese mos bah au nia papa no mama tamba liu husi sira mak hau bele hare mundu nia furak no Maromak Nia domin mai hau. Iha hau nia jornada vokasaun nian nu’udar novisa hau hare no simu buat barak tebes husi Nai, nu’udar prezente furak ne’ebe Nai fo mai hau. Hau simu ksolok, domin no talentu oi-oin ne’ebe hau uza atu hahi Maromak no servi maluk sira. Tamba hau ho talentu sira ne’e hau bele kolabora liu tan iha komunidade no iha misaun. Iha future hau pronto nafatin atu simu buat ne’ebe Nai fo mai hau, atu kontinua kolabora iha moris lor-loron tuir Nai Jesus Nia planu bah au nia moris”.

Nov. Adelaide dehan: “ Hau agradese uluk Nai ba vokasaun ne’ebe hau simu no ba Ninia akompañamentu to’o iha momentu ida ne’e. hau simu buat barak tabes ona husi Nai no hau fiar katak ida ne’ebe Nia fo mai hau mak ida ne’ebe diak liu tuir Ninia planu. Hanoin ba tradisaun atu fo prezente ba ema ida katak atu ksolok ba nia, sei esforsu atu fo buat ne’ebe diak liu. Hateke fali ba esperiensia sira ne’ebe liu ona, sei lao dadaun no sei kontinua tan iha future, halo hau kompromete-an atu haka’as-an iha moris ne’ebe hau halao lor-loron, hodi prepara prezente kiik sira ba Nai.  Domin, talent no buat hotu ne’ebe hau simu, ida ne’e mak hau sei prepara fali ba Nia. Maski hau hatene katak prezente ne’e kiik maibe hau fiar katak ida ne’e folin iha Maromak nia matan.  Hau hein hela atu bele fo ida ne’ebe folin liu iha tempu ne’ebe mai”.

Nov. Agustinha dehan: “ Hau agradese ba Aman Maromak ba prezente mmoris  nian, iha momentu ida ne’e: “Hau nia klamar hahi ho ksolok ba Maromak ba prezente vokasaun nian, especialmente vokasaun Salesiana nian ne’ebe tau matan liu-liu ba foinsae sira. Durante hau nia jornada moris nian no agora dadaun nu’udar novisa hau kolabora iha moris komunidade no misaun ho buat ne’ebe Maromak fob a hau. Buat hotu ne’ebe Maromak fo mesak furak no kmanek. Hanesan; tempu: Nia fo ba hau tempu atu hau bele admira no halo diak barak. To’o iha momentu ida ne’e buat diak ne’ebe hau fo ona mak hanesan admirasaun ida. Iha tempu tuir mai ho Nai nia tulun hau pronto nafatin fo buat ne’ebe diak liu iha komunidade no misaun.

Nov. Adelia mos dehan: “Hau hahi no agradese ba Nai ba vokasaun ne’ebe hau iha. No agredese liu-liu tamba hau simu bolun iha kongregasaun Salesiana. Buat diak ne’ebe hau bele fob a Maromak mak hau nia-an rasik, atu servi Nai. Ho talent sira ne’ebe Nai rasik haraik  mai hau. Husi talent sira ne’e Nai husu hau atu kontinua fahe iha hau nia moris, iha komunidade no mos iha misaun. Nu’udar novisa buat ne’ebe hau bele kontribui ba Nai nia misaun mak fo hau nia tempu no haka’as-an atu halo buat ne’ebe diak nafatin.  Hare ba future husu Nai atu kontinua hamutuk ho  hau, nune’e hau nune’e hau  bele fo buat ne’ebe diak ba Nai liu husi ema sira ne’ebe hau hasoru. Hanesan Amo Papa nia liafuan iha exortasaun Christus Vivit 143 ne’ebe dehan ona iha leten. Frees ne’e  tulun tebes hau atu saran hau nia-an ba Maromak ho gratuita tamba hau simu gratuita no haka’as-an nafatin atu fo buat ne’ebe diak liu ba Nai”.

Ita ida-idak agradese ba diak hotu ne’ebe ita simu no dehan ba ita nia-an: “moris ba! saran ita nia an ba moris ne’ebe diak liu”. Nune’e iha loron especial ida ne’e ita hanoin hodi reza ba vokasaun iha Kreda universal no reza vokasaun Salesiana. Kristu bibi atan diak sei bali ita hotu no halibur ita iha Nia bibi luhan no proteje ita husi buat a’at hotu  ne’ebe ita hasoru iha mundo ohin loron.

Noemia de Deus FMA