“La iha ema ida ko’alia hanesan ne’e; – Kardeál sira hateten kona-ba Catarina – la’ós feto ida mak ko’alia; Espíritu Santu mak ko’a’la liuhusi nia ibun”.

 

Catarina de Siena moris iha 1347, iha aldeia Fontebranda (Siena-Itália).  Nia Giacomo Benincasa no Mona Lapa nia oan. Kazál ne’e iha oan 25.

Molok hakle’an uitoan kona-ba Santa Catarina de Siena nia moris, ita komprende lai kontestu istóriku nia moris bá.

Iha sékulu XIV, husi 1300 to’o 1400, Igreja liu husi momentu difisil liu, liuliu iha Krsitanizmu nia knuuk, katak Europa.  Sékulu ne’e Europa esperimenta epidemia aat liu (iha tempu ne’ebá Peste Negra ne’ebé oho populasaun 1/3 ne’ebé horik iha kontinente).

Iha tinan maizumenus 1309 Santu Padre transfere tiha ba sidade Avignon, iha Fransa, tanba Roma hasoru konflitu boboot. Família nobreza romana barak hadau malu podér, nosira nomeia bispu, kardeál sira ho intensaun atu hetan podér iha Roma liuhusi Igreja. Aleinde ne’e, musulmanu sira invade Itália iha parte Tasi-Mane no iha Tasi-Feto iha normandu sira. Tanba ne’e mak estadu pontifísiu iha situasaun ameasadu ho forma barak no husi parte hotu.

Nune’e mak muda tiha papadu ba Avignon. Maibé, transferénsia ne’e la di’ak, tanba ba tinan 70 Amu-Papa sira hela iha liurai franseze sira nia okos. Liurai sira ne’e ida mak Filipe IV, nia tau tiha Papa Bonifácio VIII iha kadeia.

Iha sékulu ida-ne’e mós, ita iha “Grande Cisma do Ocidente”, iha-ne’ebé Kreda iha Papa no anti-papa sira, no até papa na’in tolu iha tempu hanesan.

Se ita hatteke ba istória Igreja nian, ita haree momentu naroman no nakukun sira. Maibé ita be;e iha serteza katak naroman sira boot liu duke nakukun. Kristu hakarak atu istória Igreja nian, ema nia salvasaun hala’o iha sirkunstánsia umana hotu. Ita haree Maromak foti mane no feto sira, santu loloos sira atu leno Igreja iha tempu susar nia laran; iha nia oan sira ninia salan, erezia sira, persegisaun sira… maibé ita haree Igreja mors hikas hanesan primavera.

Liuhusi Santa boot na’in rua, Santa Brígida husi Suécia no Santa Catarina de Sena, ne’ebé ohin ita selebra nia festa mak ita haree Igreka hamriik iha sékulu XIV.

Santa Catarina bá to’o Amu-Papa Gregório XI no husu ba nia atu sai husi ezíliu iha Avignon no filafali bá Roma, atu devolve unidade ba povu katóliku. Ho autoridade no respeitu, nia dehan ba Amu-Papa katak nia até horon infernu nia  iis dois iha ninia korte. No Amu-Papa Gregório XI halo tuir.

Catarina, husi ki’ik-oan kedas rona Maromak nia bolun. Nia hala’o ninia infánsia iha silénsiu, peniténsia no orasaun. Nia la preokupa ho sasán sira ne’ebé ninia familiar sira baibain preokupa, Ho tinan hitu de’it, nia hakarak entrega an tomak ba Maromak de’it, lahó ligasaun ida ho mundu ema nian, nune’e, Catarina husu ba Virjen Maria atu rai nia iha kastidade, atu nia sai Jezús nia kaben. “Ha’u hadomi Nia ho ha’u-nia klamar tomak – nia dehan ba Na’i-Feto – no ha’u promete ba Nia atu nunka la aseita kaben seluk”.

Atu halai husi nia aman-inan sira, ne’ebé hakarak nia kaben, Catarina tesi ninia fuk naruk, hodi la dehan liafuan ida ba sira. Tanba nia desidida atu sai Kristu nia espoza mesak de’it.

Enkuantu nia hanoin iha vida relijioza iha Orden boboot sira, S. Domingos mosu ba nia iha mehi no promete ba nia katak, sei simu nia iha nina família espirituál boot.

Ho tinan 16, depoizde insiste barak, nia tama ka hetan admisaun iha “Ordem Terceira de São Domingos”. No la demora kleur atu ninia moris virtude nian dada ema sira ba nia. Hale’u nia, Amu-Papa Bento XVI dehan, “moris família espirituál loloos ida”. Nia, ne’ebé hadomi ema hotu, ho fuan ida inan nian tebes duni.