Husi Ir Dolores Ribeiro

Dili – Hotu tiha foramasaun parte dahuluk nian ne’ebé hakle’an kona ba moris Orasaun, ami kontinua fali ami nia formasaun iha parte daruak  nian ne’ebé hare kona ba moris Komunidade nian, ne’ebé ami halao durante loron lima nia laran, hahú husi loron 17 to’o 21 de Jullu; ne’ebé lori ami atu reflete no hateke fali ba ami nia esperiénsia sira durante ne’e iha ami ida-idak nia moris iha Komunidade nia laran; ne’ebé iha ne’ebá tulun ami atu koñesse an rasik, haburas ami nia an, no ami nia vokasaun nu’udar Sarani, Relijioza no liuliu nu’udar Maria nia Oan Feto sira iha Kreda.

 

Fiar no Domin, sai nu’udar Airin ida atu harii Komunidade. Hodi fiar katak Maromak mak tau ema ida-idak hamutuk atu bele kontinua Ninia misaun salavasaun nian no Domin ne’ebé halibur ema hodi sente nu’udar Bin Alin ne’ebé nafatin buka atu suporta malu, Kompreende, pasiensia, fahe ba malu buat diak sira atu hariku malu nune’e ema ida-idak bele sente hanesan família ida iha Maromak nia naran. Liu husi Me. Mazzarello nia surat no Ita nia Kostitusaun halo ami  haree fali ba Irman sira Komunidade dahuluk nia moris ne’ebé liu husi sira nia ksolok no simplisidade; sira buka moris tuir valór Kristaun ne’ebé kle’an, hodi tau sira nia hun iha Eukaristia no iha moris orasaun; buka atu sai haraik an nafatin hodi moris ho simples nakonu ho servisu, fiar, esperansa, no domin ne’ebé kle’an; moris nu’udar família ida iha Maromak nia domin hodi fó an tomak ba Na’i li husi sira nia knaar loro–loron nian.

Hodi reflete hamutuk no hakle’an Ita-nia Kostitusaun, Maromak nia Liafuan no Me. Mazzarello nia surat sira, lori no tulun irmán ida-idak atu konxiente ba nia an rasik nu’udar “ema” ida ne’ebé  ho nia an rasik mak forma komunidade ida hamutuk ho irmán sira seluk. Nune’e nu’udar membru komunidade ida buka haka’as an atu hola parte no sente hanesan família ida, nune’e buka atu kolabora hodi bele haburas no harii armonia iha komunidade. Nune’e hamutuk bele servíi labarik no foin-sa’e sira iha ita nia misaun.

Tuirmai irmán ruma nia reflesaun pesoál:

“Komunidade mak fatin Eskola moris nian, iha ne’ebé ema aprende hadomi Maromak no maun alin sira, ne’ebé hela hamutuk no mós sira ne’ebé presiza tebes Maromak nia laran sadia no solidariedade fraterna.  Komunidade mós mak fatin eskola domin nian ne’ebé tulun ita sai buras iha Maromak no maun alin sira no Iha ne’e mak ami aprende atu moris hamutuk iha ksolok no mós iha difikuldade nia laran. Maske ema ida – idak iha ninia frakeza no limitasaun maibé liu husi koresaun fraterna no komprensaun sei tulun ema ida – idak sai tasak to’o konfigura – an ho Kristu.  Ami sente kontente tebes tamba ho Irmán sira ida – idak nia esperiénsia moris komunidade nian, hariku liu tan ami no mós halo ami sai konsiente liu tan ba ami nia an no tulun ami  deskobre buat ne’ebé presiza atu hakaas – an  nu’udar ami nia kontribusaun ba moris fraterna”. (Ir. Ligia Fatima no Ir. Theresia  Ruing)

“Husi diskursu sira ne’ebé ha’u rona durante loron hirak ne’e nia laran liu husi Me. Mazzarello nia surat sira no mós Konstitusaun FMA nian ne’ebé tulun no hariku liu tan ha’u nia an, atu wainhira fila fali ba ha’u nia komunidade hamutuk ho ha’u nia Irmán maluk sira bele hari uniaun entre ami, nune’e bele hametin liu tan ami-nia relasaun; maske ema ida-idak iha ami nia defeitu sira maibé husi ne’e mak ami buka atu hamutuk hari komunidade ida iha ne’ebé bele habelar Maromak nia domin”. ( Ir. Alice Filipe)

“Ho esperiénsia durante loron hirak ne’e nia laran, husi buat ne’ebé ha’u rona no fahe ba malu kona ba moris komunidade, liuliu hateke fali ba komunidade dahuluk Me. Mazzarello no Don Bosco nian  iha ambiente ida  ne’ebé  sensivel ba valór sira Kristaun nian, husu mós mai ha’u atu oinsá buka atu tau ha’u nia an iha komunidade hodi buka kolabora no hola parte iha komunidade nia moris. Husi ne’e halo ha’u mós reflete katak loos duni, iha komunidade mak bele tulun ha’u sai buras maske iha ne’ebá dala ruma hetan no hasoru difikuldade sira, no ho ne’e presiza mós ha’u nia hakaas an atu bele hari armonia iha komunidade nia laran”. (Ir. Ana Maria)

“Ita nia Irmán dahuluk sira pratika loloos duni oinsá moris fraterna iha komunidade hodi buka moris tuir virtude sira Evanjellu nian iha sira nia leet. To’o ohin loron sei kontinua habelar iha komunidade sira  tamba ida ne’e mak sai nu’udar aspetu ida ne’ebé  importante tebes iha moris fraterna nian. Hanesan iha S. Paulo nia surat dehan “Labele hadomi Na’i ne’ebé  la bele hare, se ha’’u la hadomi ha’u nia maluk sira ne’ebé ha’u hare ” ( Rom. 13:8). Ida ne’e atu hatudu katak se ita hadomi tebes ita nia Na’i, ita mós sei pratika domin ida ne’e iha ita-nia moris liuliu iha ita-nia komunidade; iha ne’ebé hatene tau matan ba malu, respeita malu, fó korresaun ba malu ho karidade, hatene obedese ba malu ho haraik – an, hatene kria ambiente ne’ebé armonia no unidade iha komunidade nia laran. Hodi pratika loloos virtude hirak ne’e ita bele  bele dehan katak komunidade FMA hetan moris nia abut kle’an iha Mistériu komuñaun ho Santíssima Trindade”. (Ir. Elezita Gonzaga)

“Ho reflesaun hotu ne’ebé ha’u rona, lee no fahe ba malu durante loron hirak ne’e nia laran; tulun tebes ha’u atu komprende liután importánsia moris komunidade nian, iha dalan vokasaun ida ne’e atu bele moris ho ksolok nafatin.  Agradese ba Santíssima Trindade ne’ebé marka ninia prezensa iha komunidade ida-idak nia laran, atu hametin liután ita-nia relasaun komunidade nian iha moris loro–loron.  Iha buat barak ne’ebé liu husi reflesaun hirak ne’e, fanu fali ha’u no halo ha’u sai konxiente liután kona-ba moris komunidade nia furak.  Liuhusi Konstitusaun FMA no Me. Mazzarello nia surat sira no esperiénsia sira ne’ebé Irmán ida-idak espresa iha momentu Sharing nian, ba ha’u sente sai hanesan bukae ida ho folin boot tebes ne’ebé tulun, hamahan, gia, no akompaña ha’u loron ba loron atu buka haka’as–an ho ksolok no simples iha haraik an hanesan Me. Mazzarello iha komunidade no misaun ne’ebé Maromak haraik mai ha’u”. (Ir. Noemia Belita)