Maun no biin-alin sira!

 

Fulan Maiu besik daudaun ina, iha-ne’ebé Maromak nia povu manifesta ho forma partikulár domin no devosaun maka’as ba Virjen Maria. Iha fulan ida-ne’e, tuir tradisaun ita reza Tersu iha uma ho família; dimensaun doméstika, ne’ebé restrisaun sira pandemia nian «obriga» atu valoriza, inkluzive husi pontudevista espirituál.

Tanba ne’e, ha’u hanoin propoin bai mi atu deskobre filafali beleza reza Tersu iha uma, iha fulan Maiu. Imi bele halo hamutuk ka individualmente: imi mak deside tuir situasaun sira, hodi valoriza posibilidade rua hotu. Naran de’it, iha segredu ida atu halo didi’ak: simplisidade; no fasil hetan, iha internet mós, eskema di’ak atu tuir iha ninia resitasaun.

Aleinde ne’e, ha’u oferese orasaun rua ba Na’i-Feto, ne’ebé imi bele reza remata Tersu: ha’u rasik sei reza iha fulan Maiu, hodi sai ida de’it ho imi espiritualmente. Hamutuk ho Surat ida-ne’e, atu nune’e bele iha dispozisaun ba ema hotu.

Maun no biin-alin sira, kontemplasaun Kristu nia futar oin nian, hamutuk ho Maria nia fuan, ita-nia Inan, halo ita sai hamutuk liután nu’udar família espirituál no tulun ita supera prova ida-ne’e. Ha’u sei reza ba imi espesialmente ba sira ne’ebé terus liu, no imi, halo favór, reza mai ha’u. Ha’u agradese imi ho fuan no haraik bensan bai mi.

 

Roma, São João de Latrão, iha Festa São Marcos Evanjelista, 25 Abríl 2020.

Francisco

 

ORASAUN DAHULUK
Óh Maria, ita-boot sempre fó naroman ba ami-nia dalan nu’udar sinál ida ba salvasaun no esperansa. Ami tau ami-nia konfiansa iha ita-boot, isin-di’ak ba ema moras sira, ne’ebé hela metin iha kruz hún, sai ida de’it ho Na’i Jesus nia sofrimentu, mantein firme ita-boot-nia fé.
“Ita-boot mak salvasaun povu Romanu nian”, Ita-boot hatene ami-nia nesesidade no ami hatene katak Ita-boot sei haraik mai ami, atu nune’e, hanesan iha rai Kaná Galilea nian, ksolok no selebrasaun bele mai filafali liutiha provasaun ida-ne’e.
Tulun ami, Inan domin divina na’in, atu nune’e ami bele konforma ami-nia an tuir Aman Maromak nia hakarak no halo tuir saida mak Na’i Jesus hateten ona mai ami. Nia lori mesak ami hotu nia sofrimentu, no hatodan Nia an ho ami-nia moras sira hodi lori ami hotu, liuhusi Kruz, ba ksolok resurreisaun nian. Amen.
Ami la’o buka hodi harohan husu ita-boot-nia tulun, óh Maromak nia Inan Santa, keta husik liu leet ami-nia harohan sira ba ami-nia nesesidade loroloron nian, maibé hasai ami husi buat aat hotu, oh Vírjen Glorioza nakonu ho grasa.
ORASAUN DARUAK
“Ami la’o buka hodi harohan husu ita-boot-nia tulun, óh Maromak nia Inan Santa”
Iha situasaun orrível agora ne’e, bainhira mundu tomak sai preza ba sofrimentu no angústia, ami halai ba ita-boot, Maromak nia Inan no ami hotu nia Inan, husu tulun hamahan an iha ita-boot-nia protesaun.
Óh Vírjen Maria, ita-boot-nia matan ne’ebé nakonu ho mizerikórdia, tau matan mai ami iha pandemia virus corona ne’e. Fó ksolok ba sira ne’ebé lakon esperansa no laran susar tanba lakon sira-nia família ne’ebé sira hadomi, no dalaruma ema hakoi sira ho dalan ne’ebé halo sira sente triste tebes.
Hakbesik an ba sira ne’ebé sente angustiadu ho sira-nia família ne’ebé sira hadomi, sira ne’ebé moras no labele bá besik sira, atu nune’e prevene da’et husi virus ida-ne’e. Hakonu ho esperansa bá, ba sira-ne’ebé moris iha terus no susar nia laran, tanba lahatene sei sai oinsá sira-nia moris iha futuru no konsekuénsia husi ekonomia no serbisu.
Maromak nia Inan no ami hotu nia Inan, harohan ba Aman Maromak laran-luak atu bele tulun ami, atu nune’e sofrimentu boot ne’e bele lakon husi ami-nia leet no atu nune’e, esperansa no dame bele mosu filafali iha ami-nia leet. Hanesan iha rai Kaná, ita-boot harohan da’et ba ita-nia Oan-Mane, husu Nia atu konforta ema moras sira-nia família no vítima sira, no loke ita-boot-nia fuan ba konfiansa.
Proteje doutór/a sira, enfermeiru/a sira, ajente sira saúde nian, no voluntáriu sira ne’ebé, iha liña primeira hodi fó sira-nia an tomak hasoru situasaun emerjénsia ida-ne’e atu bele salva ema seluk. Nune’e, haforsa bá, sira-nia esforsu eróiku ne’e no fó ba sira, forsa, jenerozidade no isin-di’ak.
Hamutuk bá, ho sira ne’ebé tulun ema moras sira loron-kalan, no relijiozu/a sira ne’ebé ho sira-nia laran-badinas ka solisitude pastorál no dedikasaun evanjélika, haka’as an tulun no suporta ema hotu-hotu.
Vírjen grasa barak liu, haroman bá, feto no mane sira-nia neon, ne’ebé involve iha peskiza sientífika, atu nune’e, sira bele hetan solusaun efetiva hodi bele rezolve no manán virus ida-ne’e.
Haforsa bá lideransa nasionál sira, atu nune’e ho sira-nia neon matenek, laran-badinas no laran-luak, sira bele tulun ema kiak no mukit sira, ne’ebé laiha nesesidade bázika ba moris loroloron nian no planea solusaun sosiál no ekonómika ho klarividénsia no espíritu solidariedade.
Maria Santísima, book ami-nia fuan bá, atu nune’e fundu integradu ho montante boot ne’ebé uza hodi dezenvolve no mellora armamentu sira-ne’e bele uza hodi mellora no promove estudu adekuadu hodi prevene katástrofe sira-ne’ebé hanesan mosu iha futuru.
Inan Domin na’in, tulun ami atu konsiente katak ami hotu mai husi família boot ida de’it no hatene momoos tali ne’ebé kesi ami hamutuk, nune’e, iha espíritu fraternu no solidáriu, ami bele tulun hakmaan situasaun pobreza no nesesidade. Enkoraja ami atu firme iha fiar, perseveransa iha ami-nia serbisu no konstánsia iha orasaun.
Óh Maria, ksolok na’in ba ema sira-ne’ebé terus, hako’ak bá, ita-boot-nia oan sira ne’ebé moris iha terus no susar nia laran no harohan da’et bá, atu nune’e Na’i Maromak tulun sira ho Nia liman ne’ebé omnipotente no hasai sira husi terrível pandemia ne’e, atu nune’e sira-nia moris bele hakmatek no filafali ba normál.
Ami tau ami-nia konfiansa tomak iha ita-boot, ne’ebé sempre fó naroman ba ami-nia dalan nu’udar sinál salvasaun no esperansa, óh klemente, óh piedoza, óh dose Vírjen nafatin Maria. Amen.