Husi Ir Josefa Boavida

Baucau – Ho ksolok boot ami nu’udar Família Saleziana selebra festa  agradesimentu nian, iha loron domingu, 20 Jullu 2014. Festa ida ne’e ninia preparasaun halo hamutuk ho komunidade edukativa. Tema ba festa mak “Haksolok bá” hanesan konvite ne’ebé Papa Francisco halo ba relijioza/u sira hotu.

Festa ninia furak mai husi ema hotu nia kolaborasaun, ema hotu nia responsabilidade no ema hotu nia inisiativa, liuliu husi komunidade edukativa, SDB, ADMA, Antigas  Alunas, Infánsia Misionária, Oratorianu’/a sira, grupu vokasionál no inan-aman sira.

Ho ksolok boot tebes ami hasa’e ami nia louvór no agradese ba Maromak, basá “ ema ne’ebé hatene agradese mak ema ne’ebé hatene rekoñese grasa no kmanek tomak ne’ebé nia simu”, padre David hateten iha ninia omilia. Selebrasaun gratidaun ida-nee hahú ho liafuan husi Ir Jacinta Gusmão ne’ebé agradese ba prezensa partisipante hotu no kolaborasaun, liuliu ba Família Saleziana tanba ita hotu mak família ida tanba maski ita la hanesan, ita simu karizma ida de’it husi Aman Don Bosco. Temi fali Papa Francisco nia liafuan sira, nia hateten ba ema hotu prezente, liuliu ba foin-sa’e sira katak iha liafuan tolu ne’ebé ita hotu presiza uza nafatin iha ita-nia relasaun sira: “obrigadu/a, deskulpa, lisensa”.

Hafoin kontinua ho Eukaristia Santa, almosu konfraternizasaun nian no ikusmai dansa, knananuk sira husi grupu oioin.

Iha okaziaun ida-ne’e, iha parte loraik ami simu vizita husi Ir Sylwa (husi Roma-Itália) no Ir Paola Battagliola. Ir Sylwa mak vise-postuladora ba kauza Santu sira nian husi parte FMA nian. Nia la’o ba komunidade sira atu buka no haree fini santidade nian. Sira-nia prezensa sai surpreza furak ida no aumenta tan foin-sa’e sira nia ksolok,  ho sira-nia liafuan, “teatru” no  sira-nia partisipasaun iha dansa.

Iha kalan irmán sira halo orasaun agradesimentu nian, hodi fó sai ida-idak nia “magnificat” ba ksolok ne’ebé sira simu iha tinan ne’e nia laran.