Husi Ir Josefa Boavida

Baucau – Atu hatán ba ezijénsia no preokupasaun Kreda universál nian, Amu-Papa Francisco husu ba bispu sira atu organiza iha nivel dioseze  tinan família nian hodi hala’o pastorál família nian hodi haree problema ne’ebé famílai enfrenta. Basá família mak instituisaun dahuluk ne’ebé Maromak harii iha mundu ne’e, maibé hetan ninia dezafiu no problema sira. Tanba ne’e mak parókia S. António, Baucau halo inisiativa hodi hatán ba dioseze nia planu pastorál família nian liuhusi vizita ilas Sagrada família ba sentru tomak ne’ebé halo parte ba parókia, hamutuk sentru 11 (Seiçal, Buruma, Dewake, Maukali, Kaibada Uai-mua, Bau-Oli, Bakita, Gólgota, Central, Lamegua no Vila S. António). Abertura ba vizita ne’e hala’o iha loron 7 Jullu iha parókia no vizita hahú kedas ho sentru Seiçal. Sentru ida-idak simu ilas Sagrada Família nian ba loron 13. Durante loron 13 ne’e, ilas vizita sub-sentru sira noa iha fatin ida-idak iha programa hanesan formasuan ba família, velada orasaun no Eukaristia.

FMA sira Baucau nian, hola-parte iha ekipa formasaun nian, hamutuk ho relijiozu kongregasaun seluk ne’ebé hala’o knaar iha parókia hanesan Canossianas, Maristas no Putri Yosef dan Maria, hamutuk ho leigu kabe-na’in sira.

Irmán Josefa Boavida Marques FMA husi loron 7 Jullu to’o lorn 19 Jullu hamutk ho leigu na’in rua no pároku, Pe. Justiniano de Sousa, mak responsavel ba formasaun  iha Seiçal.. Durante vizita ida-nee bele haree katak família sira presiza tebtebes formasaun no relijiozu/a sira-nia prezensa, basá sira iha hakaran boot atu rona Maromak nia Liafuan liuhusi ema sira ne’ebé kompromete an ba Maromak hodi fahe esperiénsia rasik. Durante vizita iha Seiçal, Ir Josefa nafatin bá oras rua molok atu bele vizita família sira iha sira-nia uma molok fó formasaun iha grupu; halo nune’e bele dada liután família sira atu tuir enkontru formativu.

Tema ba formasaun  mak “Moris família tuir modelu Sagrada Família nian”. Durante formasaun iha mós diálogu ho família sira hodi loke liután ba sira-nia pergunta no ezijénsia formativa.

Vizita ilas nian sei remata iha loron 17 Novmbru 2014, molok hahú tempu litúrjiku Adventu nian.