Venilale, 14-04-2020. Atu selebra festa agradesimentu ba Madre  Jeral FMA, Madre Yvonne Reungoat ne’ebé ho tema: “LA TUA VITA È UN ALBERO CHE PORTA FRUTTO”, komunidade Maria Auxiliadora hahú husi dia 26 de Março depois de laudes ami reza salmo 1 nu’udar preparasaun Espiritual ba Madre nia festa ne’ebé sei realiza iha dia 26 fulan ne’e.

Ohin tersa iha dader tuku 10.30,ami irman sira hamutuk ho formande ida no representante labarik orfanatu ida halo Lectio Divina ba salmo 1 ne’ebé prepara husi sentru. Iha kondivisaun ne’e irmán ida-idak espresa sira nia sentimentu gratidaun nian ba Madre ne’ebé sai nu’udar inan no tali komuñaun ba institutu FMA nian durante ne’e, liu husi testu Bibliiku ne’ebé foti husi Salmo 1; husi reflesaun sira ne’ebé mosu katak maske ita iha distansia maibé ita sente besik ba Madre nu’udar inan ida ne’ebé nakonu ho Espiritu Santu no Sabedoria Lalehan nian, asume responsabilidade ne’ebé nakonu ho ksolok maske hasoru problema no desafiu oi-oin. Hodi hateke ba Madre nia moris nu’udar ai-hun ne’ebé hamriik besik mota ninin, ninia abut metin no klean tamba nafatin foti freskura husi be mota nian katak Kristu ne’ebé iha tempu bailoron ka udan nafatin suli; Madre nia moris hanesan ema ne’ebé  tau nia abut metin iha Kristu, Maromak nia Liafuan, sakramentu sira, karisma no metin iha Kreda.

Nune’e ami nu’udar  FMA ida-idak  empeña ami nia an atu metin no fiel nafatin iha ami nia moris loron-loron hanesan ai-hun ne’ebé moris iha be ninin nafuan beibeik, atu nafatin jera moris husi ami nia asaun ki’ik sira iha tempu pandemia Covid-19 hodi unifika ami nia orasaun, sakrifisiu sira hamutuk ho Madre.

No ami kontinua reza orasaun Ami Aman ba Madre to’o festa agradesimentu nian.

Buona Festa e Grazie Madre Yvonne!

 

Obrigada barak!

Cesarina Correia, FMA