Dili – Ohin,12, Abril 2020 iha Komunidade tolu ne’ebe besik malu iha Komoro: komunidade S. José-Noviciado, Komunidade Divina Providencia no Komunidade B. Eusebia Palomino selebra Paskua hamutuk ho Me. Assunta Konsilleira husi Roma no Me. Alma. Atu dehan durante semana Santa ami nafatin selebra hamutuk selebrasaun sira, hahu husi Domingu Ramos to’o Domingo Ressureusaun ohin. Ami agradese tebes ba Pe. Agostinho Soares, SDB ne’ebe ho laran luak, domin, disponibilidade no ksolok mai selebra Misa ba ami Komunidade tolu, maski situasaun difisil Padre nafatin mai hamansa ami nia fiar no hamutuk ho ami reza ba ema hotu no ba situasaun ida ne’e. Maromak fo bensaun no saude diak nafatin ba Padre. Iha Domingu  Ami nia Misa hahu tuku 07:00 insert ho Laudes, iha meio-dia  ami fahe ksolok konfraternizasaun nian iha Gym Eskola Maria Auxiliadora no loraik Kontinua ho Bingo Salesiano ( ida ne’e Komunidade S. José deit).

Iha okaziaun furak ne’e, Me. Assunta hato’o nia mensajen Paskua nian, hodi dehan: “Ho situasaun virus corona nian ida ne’e, ita hare ho matan pozitivu. Agora iha ita nia uma sira laiha labarik no joven sira halo ita nostaljia fali ba sira nia prezensa. Ida ne’e oprtunidade ba ita nudar komunidade atu haburas fali konfiansa ba malu. Hare fali ba Evanjellu ohin dader nian, feto sira ne’ebe lalais ba rate laos ba buka matebian ida maibe ba buka Ema ne’ebe moris.  Se ita ba rate buka matebian, ita sei hela iha parte negativu, maibe ita troka ho matan pozitivu atu ita bele hare Nai. Ita reza ba mundo atu bele sente situasaun ida ne’e nu’udar kruz ka terus maibe sei hetan moris hias ka moris foun hamutuk ho Kristu Moris Hias.”

Situasaun todan ida ne’e mosu los iha tempo forte nia laran atu halo ita para ituan hodi hateke ba Maromak. hela iha uma laran atu fahe ksolok no terus hamutuk, besik liu tan ba Maromak tamba fo tempu barak iha orasaun, haburas fraternidade no moris komuñaun. Pandemia Corona Virus-19, lori situasaun todan bo’ot ida, maski nune’e iha parte seluk ita bele deskobre situasaun pozitivu barak ne’ebe iha moris normal ita la fo importansia. Nune’e mai ita reza hamutuk atu situasaun ne’e liu lalais no husu protesaun ba ita ida-idak. Obrigada barak.

“Paskua Kmanek ba ita hotu! Kristu Moris Hias Ona!”

(Noemia de Deus)