Segundu Novisiadu FMA 2014

Dili – Irmán FMA na’in ualu hahú sira-nia segundu novisiadu iha loron 9 Jullu ba fulan ida nia laran. Sira-nia enkontru no esperiénsia sira soi nu’udar objetivu atu halo avaliasaun ba sira-nia moris konsagrada hodi fahe esperiénsia sira no hametin sira-nia desizaun molok halo kompromisu saran an ba nafatin atu tuir Kristu iha Institutu FMA. Iha loron lima ne’e nia laran, sira la’ós de’it konfronta sira-nia moris orasaun nian ne’ebé tenke lori ba konfigurasaun liután ho Jezús, maibé mós halo esperiénsia orasaun nian hanesan Maria nia orasaun no Jezús nia orasaun, orasaun rekonsiliasaun, nst.

Ir Jacinta Gusmão ne’ebé fasilita esperiénsia no enkontru loron lima ne’e nia laran, lori irmán sira atu valoriza liután momentu sira orasaun pesoál no komunitária, indika dalan ruma hodi halo mós esperiénsia no husu irmán sira halo kompromisu pesoál atu hadi’ak liután sira-nia vida orasaun nian, durante Eukaristia ohin dadeer nian nu’udar konkluzaun ba bloku primeiru enkontru segundu novisiadu nian.

Tuirmai ne’e sira-nia kompromisu pesoál:

“Ha’u konvensida katak orasaun mak nu’udar meiu ka dalan ida ne’ebé lori ha’u atu hametin no haburas liután ha’u-nia domin ba Aman Maromak liuhusi Jezús Kristu no iha Espíritu Santu; tan ne’e, depoizde enkontru kona-ba vida orasaun nian, ha’u hakarak haka’as an atu halo ha’u-nia orasaun sira sai di’ak liután hahú husi meditasaun, Laudes, Eukaristia ne’ebé sai nu’udar hun ba orasaun hotu, Rozáriu, Vésperas no Rekonsiliasaun, hodi prepara an didi’ak, fó espasu ba silénsiu interiór, hamamuk an, unifika ha’u-nia sentimentu no pensamentu iha tempu orasaun nian no foti figura pasajen Evanjellu nian ne’ebé sai nu’udar akompañadora iha ha’u-nia moris loroloron nian. Ba ne’e ha’u foti Na’i-Feto Maria Ausiliadora nu’udar ha’u-nia modelu feto orasaun nian ne’ebé hatene kolabora ho Espíritu Santu”. (Ir Elizita Gonzaga)

“Liuhusi esperiénsia moris orasaun nian ne’ebé tulun ha’u atu tama liután iha ha’u-nia vida interiór ho Na’i Jezús, nune’e, iha ha’u-nia moris loron ba loron nian, buka atu sai ida de’it ho Nia ba nafatin liuhusi ha’u-nia saran an totál.

Na’i Jezús, maski ha’u ema la perfeitu no la soi, maibé Ita hili no bolu ha’u atu konsagra ha’u-nia moris ne’ebé la perfeitu ne’e ba Ita-Boot, hodi serví Ita-nia maluk sira: haraik mai ha’u Ita-nia Espíritu atu gia ha’u tuir de’it Ita-Boot nia hakaran, la’ós ha’u-nia hakaran, Amen”. (Ir Jacinta de Deus)

“Na’i Maromak, ha’ú hahí Ita ba kmanek hotu ne’ebé Ita haraik mai ha’u. Ha’u husu Ita-nia kbiit no Ita-nia grasa atu ho enkontru ida-ne’e, ha’u hakarak hadi’ak liután ha’u-nia moris orasaun, ha’u-nia relasaun ho Ita-boot. Amen”. (Ir Alice Filipe)

“Ha’u sei haka’s an atu:

• prepara an antes hodi lee Maromak futar Lia no salmu sira;
• hakerek meditasaun loroloron;
• halo gráfiku ba hahalok sira durante loron tomak (ezame konxiénsia partikulár);
• halo verfika iha momentu kolókiu nian”.(Ir Lígia Sarmento)

“Ha’u promete:

• haka’as an no konstante halo vida orasaun nu’udar relasaun apaixonada nafatin ho Jezús iha ha’u-nia moris loroloron nian;
• haka’as an, konstante iha moris loroloron konxiente no prepara an ba liturjia loron tomak nian, hahú husi meditasaun, Laudes, Vizita, Vésperas no Eukaristia ne’ebé sai nu’udar hun ba orasaun hotu-hotu no sakramentu Rekonsiliasaun tulun ha’u hadame malu ha’u nia an ho Maromak no ema hotu. Nune’e, neineik-neineik bele transforma ha’u-nia moris loroloron nian ho Jezús”. (Ir Theresia Tutu)

“Liuhusi enkontru loron hirak ne’e, ha’u hakarak hadi’ak liután ha’u-nia moris orasaun hodi haka’as an atu:

• prepara antes ho di’ak atu partisipa iha tempu orasaun pesoál no komunitária ho konxiénsia liután;
• kolabora no loke an ba Espíritu Santu atu partisipa di’ak iha tempu orasaun no sakramentu sira;
• hamamuk ha’u-nia an hodi simu Maromak nia grasa no saran buat hotu ba Maromak, tan Nia hatene buat di’ak hotu ba ha’u-nia moris”. (Ir Noemia de Deus)

“Na’i Aman, Oan no Espíritu Santu, ha’u hahí no agradese ba Ita-Boot ba kmanek hotu ne’ebé ha’u simu iha loron hirak ne’e. Maun Jezús, ho enkontru ida-ne’e, ha’u hakarak atu hadi’ak liután ha’u-nia moris orasaun, hodi prepara ha’u-nia an hodi sai konxiente liután ba sakramentu sira. Ha’u hakarak atu medita liután Ita-Boot nia Liafuan sira hodi konfronta ho ha’u-nia moris. Maun Jezús, tulun ha’u no ajuda atu hakbesik nafatin ba Ita. Amen”. (Ir Ana Maria)

“Liuhusi formasaun ida-ne’e, ne’ebé hakle’an fali moris orasaun nian liuhusi Maromak nia Liafuan no Konstituisaun FMA nian, halo ha’u hanoin no reflete hodi haree fali ba ha’u-nia esperiénsia sira ne’ebé ha’u hala’o durante ne’e. Loos duni, orasaun mak nu’udar ha’u-nia diálogu pesoál ho Maromak ne’ebé husi ne’e fó forsa no tulun ha’u atu bele hala’o dalan moris ne’e ho ksolok no tau nafatin laran-metin iha Na’i. Husi reflesaun sira ne’e, ha’u mós sente katak presiza hadi’ak ha’u-nia an atu bele hametin liután ha’u-nia diálogu ida-ne’e. Tan ne’e, ohin iha Na’i nia futar oin, ha’u ho haraik an hakarak haka’as an iha:

• Buka sai konxiente nafatin iha momentu orasaun hodi la husik ha’u-nia an mout iha preokupasaun no distrasaun sira;
• Prepara ha’u-nia an rasik molok hasoru Maromak iha orasaun;
• Haka’as an nafatin atu moris tuir Maromak nia Liafuan no liuliu banati tuir Inan Maria Ausiliadora nia virtude sira. (Ir Dolores Ribeiro)