Dili, 28 marsu 2020

Irmán doben sira,

ohin dadeer (ka kalan boot) ita hotu asiste ba orasaun estraordinária ne’ebé Amu-Papa halo. Ita hamutuk ho ema husi mundu tomak, hodi fiar katak kbiit orasaun nian mak maka’as!

Ha’u hanoin katak Amu-Papa nia liafuan sira no mós ambiente no klima ne’ebé kria, kona ita-nia laran no sai momentu emosaun boot nian. Tanba bele hetan ona omilia ho lian oinoin, ha’u konvida imi atu download no oferese ba Irmán sira atu bele medita liafuan hirak ne’e.

Atu momentu ida ne’e la hela de’it iha ita-nia sentimentu sira, maibé sai motivu atu troka buat ruma iha ita-nia moris, ha’u hakarak haruka ba imi reflesaun ruma.

Amu-Papa ko’alia barak kona-ba solidariedade no esperansa: ita-nia solidariedade, iha momentu ida ne’e, bele espresa uluknanai hodi obedese ba regra sira ne’ebé ita-nia nasaun sira ka Kreda estabelese. Hanesan Amu-Papa dehan: “Ita husik esperansa hametin no suporta medida sira no dalan posivel sira ne’ebé tulun ita atu tau matan ba ita-nia an no tau matan ba ema seluk”. Ita hela iha uma, no aproveita ho tempu ida ne’e atu lee, reflete, reza. Ha’u hatene katak komunidade ruma halo loron-loron adorasaun hodi reza ba ema ne’ebé moras no ba sira ne’ebé tau matan ba sira. Ha’u konvida komunidade hotu atu bele hili tempu ida ba adorasaun: ida ne’e tulun boot ne’ebé ita bele fó ba sira ne’ebé luta hasoru virus ida ne’e. Doutór ida hakerek mai ha’u: “Ami besik ona atu rende an, maibé ami kontinua metin no luta tan imi-nia orasaun!”. Iha ninia sirkulár ikus nian, Madre Jerál mós hakerek katak orasaun mak sinál importante.

Amu-Papa fó hanoin mós katak “ita la’ós autosufisiente, ita mesak mout”: ida ne’e mak “momentu komunidade nian”, momentu ne’ebé ita bele aproveita atu hakle’an ita-nia moris komunitária, fó valór ba ita-nia espíritu família nian, fó tempu uitoan tan atu servisu hamutuk no halimar mós hamutuk. Karik entre ita iha tensaun ka inkomprensaun ruma: ha’u hanoin katak ida ne’e momentu di’ak atu esklarese, halo pasu atu bele “kura” ita-nia kanek sira. Amu-Papa temi “izolamentu (haketak an”?) ne’ebé ita sofre tan falta afetu no enkontru sira”: iha nasaun ne’ebé hetan moras todan, ema terus no mate mesak, família la bele asiste sira no la bele akompaña iha momentu mate nian no mós ba rate. Família sira la bele hatudu sira-nia domin ba ida ne’ebé sira hadomi tan separasaun ida ne’e. Ita-nia moris iha komunidade, ita-nia espíritu família nian mak rikusoin karizmátiku ne’ebé dala ruma ita la konsidera, ita la hanoin ba nia nu’udar prezente, maibé nu’udar kastigu ida. Durante orasaun ho Amu-Papa, ita reza “Husi fuan toos no inkapasidade atu hadomi, Liberta ami, Na’i”. Tan ne’e, hodi hanoin no oferese ba sira ne’ebé susar no terus iha momentu ida ne’e, ha’u konvida komunidade hotu, Irmán ida-idak atu hariku momentu ida ne’e ho imi-nia empeñu (no dala ruma, karik, sakrifisiu) hodi moris iha komunidade ho espíritu gratidaun nian, hodi agradese ba Irmán ida-idak ne’ebé moris hamutuk ho ha’u, hodi agradese ba tulun no dezafiu hotu ne’ebé ha’u simu husi komunidade. Iha la’o-dalan ida ne’e, Madre nia sirkulár 995 (ikus, ne’ebé seidauk simu ho lian tetum) bele tulun ita atu hakle’an gratidaun nia signifikadu. Ita bele fahe ita-nia reflesaun hodi husu Maromak atu liafuan furak sira ne’ebé ita sei fahe la hela de’it iha ibun tutun, maibé sai haka’as an moris nian.

Ohin dadeer ita harohan: “Bainhira ami buka soin loos no ksolok loos, Na’i, haraik Ita Espíritu mai ami”, no ita simu absolvisaun ba ita-nia salan hotu: ita hakarak moris iha kondisaun grasa nian ne’ebé Maromak haraik mai ita, tan ne’e ita reza ba malu atu loron hirak ne’e bele sai momentu hafoun an iha ita-nia vokasaun no halo ita-nia komunidade sai “uma domin Maromak nian”.

Hodi konfia iha Maromak nia grasa no iha ida-idak nia haka’as an, ha’u hakohak imi hotu

Sr. Alma Castagna