Venilale, 19/03/2020. Iha festa solenidade São José nian, iha tuku 03.00 lorokraik Madre Assunta hasoru grupu infansia misionaria hamutuk ho asosiasaun sira: Laura Vicuña, Domingos Savio no Maria Auxiliadora iha salaun parokial, labarik sira kontente teb-tebes simu madre ho sira nia dansa no kantu infansia misionaria nian; hafoin labarik sira mos hato’o sira nia atividades ne’ebé sira hala’o iha sira nia formasaun, hafoin madre Assunta  hato’o liamenon katak: “ha’u kontente wainhira hare imi labarik sira ne’ebe buka atu sai sasin ba Kristu, hau kontente mos tamba imi sai Jesus nia disipulu ida, imi kontinua nafatin sai Kristu nia sasin iha moris loron-loron husi imi nia hahalok no jestu sira ne’ebé ki’ik”.Hafoin visita infansia misionaria madre ba kedas visita orfaun sira ne’ebé ho entusiasmu tebes hakarak atu hare no simu madre; labarik sira  simu madre ho Kantu Welcome, apresenta sira nia dialogo no dansa tradisional nu’udar sira nia bemvinda ba madre Assunta, hafoin tuir mai sira rona liafuan murak husi madre: “imi hotu mesak labarik matenek deit tamba imi bele kanta no dansa ho lian oi-oin, Madre Jeral mak haruka ha’u mai atu hasoru imi, imi mak ami nia oan sira, imi mai  iha ne’e ho motivu oi-oin, maibé Nain Feto mak lori imi mai iha ne’e tamba uma ida ne’e nia inan mak Nain Feto Maria tamba ne’e imi hetan privilejiu bo’ot tan imi sai Ninia oan, nune’e iha uma ne’e mak ita hari’i familia ida hamutuk ho madre sira, formande sira no imi ida-idak; tamba ne’e se mak moris iha uma ne’e tenki aprende atu hadomi Jesus no Maria. Imi tenki hanoin nafatin katak iha moris tomak imi mak Maria nia oan sira, ami hotu sei reza nafatin ba imi”.

Dia 20/03, loron ikus madre Assunta nia visita iha komunidade MA, iha dadersaan madre Assunta ba merkadu hamutuk ho irman sira sosa modo ba labarik sira, no kontinua ba Fatulia hodi hare povo ne’ebé horik iha ne’ebá no visita diretamente avó ida ne’ebé hela mesak no ki’ak, hafoin madre sira liuba hare foho Ariana. Iha lorokraik madre halo enkontru ikus ho irman sira iha komunidade hodi apresenta relatóriu, iha enkontru ne’e madre husu atu komunidade ida ne’e buka atu sai hanesan komunidade dahuluk Mornese nian iha ne’ebé foin-sa’e sira sente katak ema simu sira no apresenta ikona “misericordia Santissima Trindade nian”.Iha kalan komunidade ho fuan gratidaun nian, agradese madre Assunta ba prezensa durante loron 4 hamutuk ho ami hodi rona no fahe esperiensia furak oi-oin ne’ebé tulun ami atu sai buras iha moris; ami nia agradesimentu ne’e espresa husi ami nia drama no dansa simples ne’ebé ami hato’o husi fuan no presente ki’ik ne’ebé halo ho liman. Depois de drama madre Assunta fó boanoite hodi hato’o mos notisia furak katak madre jeral ba hasoru Amu Papa Francisco pesoal no amu papa fó mensajen 4 ba Madre Jeral:

1. Misionariedade iha vida religiosa no iha ita nia Karisma
2. Tau matan ba vokasaun
3. Formasaun ba vida konsagrada
4. Feto nia prezensa iha kreda ne’ebé nu’udar Nain Feto nia ilas.

 

Obrigada Barak!

Cesarina Correia FMA