Cassa  (Ainaro) – Apostuladu ba fulan Marsu ne’e nian, bele dehan espesiál oituan. Iha loron 17 Marsu, Ir. Ana Rosalia no Ir.Bendita hala’o sira nia viajem loron rua antes molok selebra Solenidade S. José, ne’ebé nu’udar padroeiru ba Kapela Cassa nian, estasaun ida entre kapela sira seluk ne’ebé hola parte ba Parókia Ainaro.

Preparasaun ba Solenidade S. José ne’e nian, ba labarik no foin-sa’e sira hahú husi konkursu, katese badak no animasaun tuir ksolok Salesiana nian ne’ebe halo labarik sira sente livre no haksolok.

Maski viajem bele dehan dook maibé, natureza sadik atu bele kontinua viajem….Iha loron tuir mai Ir. Evangelina no Ir. Armenia hamutuk ho postulante na’in 5 to’o iha Cassa.

Oportunidade ida ne’e la bele liu leet deit, ami dadalia ho ambiente família nian ho sarani sira ne’ebe mai iha uma ki’ik ne’ebé sira rasik prepara ba Irmán sira, koñese malu hodi konta stroria nu’udar katekese ba labarik sira ne’ebé hamrook kona ba Na’i nia domin.

Iha loron S. José nian halo kompleta liutan liuhusi Selebrasaun Eukaristia. Iha ninia homilia Amo Pároko, Pe. Armindo Brito aprezenta S. José ninia virtude sira ne’ebé hatene silénsiu  tan rona Na’i nia lian,  obedese hodi halo tuir Na’i nia hakarak simu Maria nu’udar nia kaben, ema ne’ebé justo no fiel atu tau matan ba “Família Nazaré.”

Iha Amu nia lia menon…nia agradese tebes ba Madre Salesiana sira nia prezensa ne’ebé fo tulun. “Obrigada barak ba Madre Salesiana sira hotu, husi komunidade Dili mai iha ne’e, tebes duni ami presiza ita boot sira nia prezensa…ami hein iha ne’e…”

Esperiénsia loron hirak ne’e, furak tebes… Obrigada ba sarani Cassa nian ne’ebé simu ami.

Sai FMA sai tulun-na’in ba ema seluk hanesan Inan Maria Auxiliadora.

(Lestari)