Roma – Tema Estreia ba 2015, tinan ne’ebé festeja Bisentenáriu Don Bosco nia moris nian (1815-2015) fó sai tiha ona iha loron ikus fulan Juñu nian.

«Nia la halo pasu ida, la ko’alia liafuan ida, la tau liman ba empreza ida, ne’ebé la iha nu’udar objetivu juventude nia salvasaun…», ne’e buat ne’ebé Pe.Rua dehan kona-ba Don Bosco. No husi abut no fonte ida-ne’e mak Pe. Ángel Fernández Artime, Susesór X Don Bosco nian, fó sai tema ninia Estreia dahuluk, ne’ebé ba direta ba sentru misaun nian: Hanesan Don Bosco, ho foin-sa’e sira, ba foin-sa’e sira. Dehan Don Bosco, realmente, dehan foin-sa’e sira. La’ós posivel evoka istória Santu ne’e nian lahó foin-sa’e sira nia hakmaluk.

Iha dalan trienál preparasaun Bisentenáriu moris Don Bosco nian, ain-hakat dahuluk mak kompromisu atu hakle’an ninia figura istórika, tuirmai koñese ninia trasu edukadór nian, atu hafoin ita simu bolun atu penetra ninia segredu profundu no razaun finál ninia atividade apostólika ne’ebé halo ita hakfodak, to’o deskobre “Don Bosco místiku”, ninia vida interiór, ninia uniaun kle’an ho Maromak, riku ho fiar, esperansa no karidade pastorál, hanesan fonte fekundidade ninia asaun nian no ninia atualidade iha tempu hotu.  Tinan 2015 mak konvite ida atu selebra prezente boot, katak Don Bosco, ho no ba foin-sa’e sira, ba Kreda no ba Família Saleziana.
Estreia, mak don ida Reitór-Mor nian, nu’udar susesór Don Bosco nian no Aman Família Saleziana tomak, ne’ebé maski iha distinsaun no diversidade grupu sira-nian, hetan estímulu atu hetan no moris misaun saleziana, hodi serví foin-sa’e sira espesialmente sira ne’ebé kiak liu. Pe. Fernández Artime destaka katak «fonte dinamizmu apostóliku ne’ebé sustenta Don Bosco no tenke sustenta membru ida-idak Família Saleziana nian mak karidade pastorál, ne’ebé hetan ninia modelu fundamentál iha Jezús nia Fuan».

Reitór-Mor afirma tan: «Ha’u dehan iha okaziaun oioin katak bainhira Papa Francisco ko’alia atu bá iha periferia, hodi dirije ba Kreda tomak, ita hetan interpelasaun maka’as no diretu, tanba nia husu mai ita atu hela ho foin-sa’e sira iha periferia, dook husi kuaze buat hotu, eskluidu, lahó oportunidade. Tempu hanesan ha’u hakarak dehan katak periferia ne’e mak buat ruma tipikamente ita-nian nu’udar Família Saleziana.  Valdocco no Mornese, ho ninia espesifisidade, mak periferia no ohin loron “periferia” signifika distinge “estrela polár iha navegasaun”, basá iha ema ikus no kiak liu sira, Pe. Fernández Artime insiste, mak “espesífiku ita-nian DNA nu’udar karizma salezianu”».

Reitór-Mor taka hodi dehan katak «sei la kuran Grasa no bensan Na’i nian, hodi Maria nia intersesaun materna, “kolaboradora boot liu Espíritu Santu nian”».

Testu kompletu aprezentasaun Estreia 2015 nian disponivel iha site www.sdb.org