Dili – Iha loron Domingo, 15-03-2020, iha oras tuku 10.30 – 11.30 animadores sira husi oratorio Beato Ceferino Namuncura (Comunidade B. Eusebia Palomino) nian hamutuk ho estrutura balun husi Movimento Juvenil Salesiano (MJS) nian hala’o enkonntru ho Me. Assunta Inoue, FMA (Consigliera Jeral  husi Roma) iha Eskola Maria Auxiliadora, Comoro hodi koalia kona ba papel animadores nian. Hafoin iha loron hanesan, iha oras tuku 15.30 – 16.30 Ir. Assunta hala’o visita ba oratorianos sira iha Centro E iha ne’ebe konstitui husi oratorianos Centro B no E.

“EDUKASAUN BA FIAR IMPORTANTE BA LABARIK SIRA”

Iha domingo kotuk, animadores hamutuk nain 24, halao enkontru ida ho Me. Assunta, FMA, konaba papel animadores sira nian. Madre hahu enkontru ne’e ho husu pergunta “tansa mak imi hakarak atu sai animador no animadora ida, iha ne’ebe imi hatene katak imi bele uza loron domingo hodi ba passeio ho imi nia kolega sira?”, no iha animador ida, Afonso ne’ebe hatan katak razaun principal ba nia hodi sai animador mak nia hetan ksolok liu husi tulun labarik sira no fahe tempo hamutuk ho sira.

Hafoin husu pergunta ne’e madre hahu fo mensagem lubuk ida ba animadores sira kona ba kna’ar loos animadores sira nian, tuir Me. Assunta, animadores sira “la’os deit fahe fiar maibe iha mos responsabilidade hodi fahe ksolok”, animadores sira tenke sai mestre no belun ba oratoriano sira no figura Dom Bosco nian mak tenke sai nu’udar figura banati nian. Madre Assunta mos hatutan tan katak animadores sira tenke prepara didiak katesizmu ba labarik sira, laos deit aprende husi livro maibe buka estrategia hodi dada labarik sira ba hatene kona ba Jesus, animadores bele hanorin maibe tenke mos hatudu hodi moris tuir sira nia fiar atu tulun labarik sira atu hadomi Maromak, animadores sira hatudu ne’e liu husi kria domin ba Maromak no Nain Feto no labarik sira bele haree ida ne’e no sira sei halo tuir ita. Madre mos haklaru tan katak Edukasaun ba fiar ne’e importante ba labarik sira, no animadores sira tenke aplika Sistema Preventivu iha oratorio, eskola no familia, iha ne’ebe

Razaun, Relijiaun no Domin Midar mak sai nuudar pilar tolu importante liu. Nu’udar ema umanu bain-bain dala barak animadores sira susar hodi kontrola sira nia hirus maibe Me. Assunta hatoo katak se animadores iha kapasidade hodi aplika pilar tolu ne’e ho diak, labarik sira sei komprende saida mak ita hato’o ba sira, exemplu simples ne’ebe madre fo mak ‘bainhira iha oratorio fatin labarik hotu koalia no sira la fo oportunidade ba mana ka maun animador ida hodi koalia, iha momentu ne’eba ita bele aplika pilar tolu ne’e ida mak hanesan ita fo razaun ba sira katak ita hotu presiza silensiu hanesan hato’o ba sira katak iha mana animadores ida ne’ebe hakarak atu fahe liafuan diak mai ita, no bainhira ita fo razaun koko atu hatudu nafatin domin”. Madre mos hatutan tan katak “animadores no salesianos sira nunka baku no nunka komanda ema tan ita fiar iha domin”.

Ikus liu, madre remata nia diskursu ho hato’o ksolok ne’ebe madre iha durante iha Timor, “Ha’u kontente tebes tan iha labarik barak iha Timor, liu-liu iha dalan iha ne’ebe bainhira sira hetan madre sira, sira sempre comprimenta”.

“SAI MISSIONARIO KI’IK BA FAMILIA”

Hafoin remata enkontru ho animadores sira husi oratorio beato Ceferino Nanuncura, iha lokraik oras tuku 15.30 -16.30, Me. Assunta halao visita badak ba oratorianos  oratorio Centro B no E pertense ba Parokia Komoro nian. Beato Ceferino Namuncura mak sira nia padroeiro. Evento ne’e hahu ho liahahu ne’ebe hato’o husi representante animadores nian hato’o katak ba animadores no oratorianos sira Me.Assunta, nia visita la’os deit nu’udar consileira Madre Geral nian maibe nu’udar representante Dom Bosco,  Madre Mazzarello ho ne’ebè lori bensaun Mama Maria Auxiliadora nian. Hafoin ne’e oratoriano sira simu madre ho hananu “welcome” no madre husik mensagem badak ba oratorianos sira katak oratorianos sira ida-idak tenke sai missionario kiik ba familia, madre enkoraja sira atu fahe saida mak sira aprende iha oratorio ba sira nia parentes no familia, madre mos husu oratorianos sira atu hadomi Maromak no hadomi maluk sira. Ohin ami hotu sente haksolok tebes ho visita badak ida ne’ebè hatudu duni Maromak nia domin no nia tau matan ba sira nebe kiik no kiak liu iha periferia.

Depois de festa ho madre, ami kontinua ami nia atividade oratorio nian  hodi taka ho Novena Maria

Auxiliadora hodi husu Nai Feto nia protesaun husi moras Coronavirus, reza ba sira ne’bè laran susar tan moras ne’e no ema laran diak barak (dotor sira ) ne’ebè tau matan dadaun hela ba maluk sira ne’ebè moras.

Obrigada barak ba madre nia presenza iha ami nia le’et.

(Husi animadora Vitoria Soares)