Ir Assunta Sumiko Inoue vizita komunidade Maria Auxiliadora, Venilale
Venilale – Komunidade Maria Auxiliadora ho ksolok boot simu madre Assunta iha loron 17 Marsu, ne’ebé mai atu halo vizita kanónika durante loron 4. Wainhira madre Assunta to’o ami simu madre ho dansa tradisional hafoin akompaña madre to’o iha Nain Feto nia oin no halo orasaun simu nian, durante orasaun madre Assunta lori lilin ba tau iha Nain Feto nia oin simbolu fiar no laran metin ba madre nu’udar Maromak nia mediadora no nu’udar Kristu nia naroman ne’ebé madre lori durante hala’o vizita kanónika.
Iha loron dahuluk ne’e madre Assunta fahe reflesaun “dalan Emaus nian” husi evanjellu Saun Lukas (Lk 24,13-35) ho irmán sira, hafoin irmán sira fahe ba grupu 2 no sharing perguntas ne’ebé madre fó; hatan tiha ba perguntas hirak ne’e ida-idak hakerek iha papel no hasa’e nu’udar oferta iha Missa no nu’udar orasaun intersesaun hahi no agradese nian ba diak hotu ne’ebé simu iha komunidade.
Loron tuirmai, 18 Marsu, iha tuku 09.00 dadeer madre Assunta hasoru formande sira pre-aspirante no aspirante sira no ko’alia ho sira kona ba oinsa atu moris hamutuk madre hahú ho pergunta 2:
- Wainhira imi hahú moris hamutuk saida mak halo imi kontente?
- Difikuldade saida mak halo imi sente difisil?
Formande sira hatan: ksolok, tulun malu, iha oportunidade atu reza ba ema seluk maske malirin no hanoin familia nune’e madre hatan ba sira: buat positivu no negativu sira mak normal, importante imi aproveita hodi hateke ba moris iha futuru; wainhira imi hetan diak agradese, wainhira hetan difikuldade koko hare no konsidera katak ne’e grasa ida husi Maromak.
Iha lorokraik madre hasoru komunidade edukativa kompostu ho foinsae animador sira no leigu kolaborador sira hamutuk nain 14, irmán nain 7 no formande nain 2; madre hateten “ha’u agradese ba imi nia kolaborasaun, ita kontinua kolabora hamutuk atu fó edukasaun diak ba labarik sira, atu sira sai buras iha sira nia moris ho moris foun umana,sarani salesiana nian; Don Bosco dehan: la to’o deit atu hanorin maibé presija sasin moris nian, nune’e ita reza ba malu atu tulun labarik sira no halo moris ne’e sai furak liu”. Depois de hasoru malu, merenda no fahe malu.
(Cesarina Correia FMA)
