Papa Francisco iha Angelus – 6 Jullu 2014

 

Maun no biin-alin sira, bondia!

Iha Evanjellu domingu ne’e nian ita hetan Jezús nia konvite. Dehan nune’e: «Mai besik Ha’u, imi hotu ne’ebé kole no terus; Ha’u sei fó kmaan ba imi» (Mt 11,28). Bainhira Jezús dehan buat ne’e, iha Nia oin Nia haree ema sira ne’ebé loroloron nia hasoru iha lurón sira Galilea nian: ema simples barak, kiak, moras, maksalak, iha ninin… Ema sira ne’e buka nafatin buka Nia atu rona Ninia liafuan – liafuan ida ne’ebé fó esperansa! – no mós atu kona ninia hatais rohan.

Jezús rasik buka ema lubun bot ne’ebé kolen no kbiit-laek hanesan bibi sira ne’ebé la iha bibi-atan (kf Mt 9,35-36) no buka sira atu haklaken ba sira Maromak nia Reinu no atu kura sira barak iha isin no iha espíritu. Oras-ne’e Nia bolu sira hotu ba Nia: «Imi mai Ha’u», no promete ba sira kmaan no kbiit.

 

Jezús nia konvite ne’e habelar to’o ita-nia tempu, atu bele atinje maun no biin-alin barak ne’ebé moris iha kondisaun susar, tan situasaun ezistensiál difisil no dalaru,a lahó pontu referénsia válidu. Iha País kiak sira, maibé mós iha periferia País riku sira nian, bele hetan ema barak kolen no kbiit-laek tan todan suporta-laek abandonu no indiferensa nian. Indiferensa: buat aat hira mak indiferensa umana halo ba ema sira iha nesesidade laran! No indiferensa sarani sira-nian! Mane no feto barak ne’ebé moris iha nesesidade , maibé mós tan insatisfasaun moris nian no frustrasaun mak hela iha sosiedade nia ninin. Barak mak obrigadu atu emigra husi sira-nia Pátria, hodi tau sira-nia moris iha perigu. Marak liután mak loroloron lori todan sistema ekónomiku ida ne’ebé esplora ema, impoin ba nia “naha” ida suporta-laek, ne’ebé ema privilejiadu uitoan de’it mak hakarak lori. Ba Aman iha lalehan nia oan ida-idak ne’e, Jezús repete: «Mai to’o Ha’u, imi hotu». Maibé Nia hateten mós ba sira ne’ebé soi buat hotu, maibé fuan mamuk no lahó Maromak. Ba sira mós, Jezús dirije konvite ne’e: “Mai to’o Ha’u”. Jezús nia konvite ba ema hotu. Maibé ho modu espesiál ba sira ne’ebé terus liután.

Jezús promete fó kbiit ba ema hotu, maibé Nia fó mós konvite ida mai ita, hanesan ukun-fuan ida: «Imi simu ha’u nia ukun ba hodi banati tuir Ha’u, tan Ha’u laran kmaus no haraik an» (Mt 11,29). Na’i nia “naha” mak lori ema seluk nia todan ho domin fraternu. Bainhira simu ona kbiit no konfortu husi Kristu, ita mós simu bolun atu sai kbiit no konfortu ba maun-alin sira, ho atitude kmaus no haraik an, hodi imita tuir Mestre. Laran-kmaus no haraik-an fuan nian tulun ita la’ós de’it atu lori ema seluk nia todan, maibé mós atu la hatodan ema seluk ho ita-nia hanoin pesoál sira, ita-nia julgamentu sira, ita-nia krítika sira eh ita-nia indiferensa sira.

Ita invoka Maria Santíssima, ne’ebé simu ema hotu ne’ebé kolen no kbiit-laek iha ninia mantu nia okos, atu liuhusi fiar ne’ebé simu roman, ho sasin moris nian, ita bele sai konfortu ba ema sira ne’ebé presiza tulun, ternura, esperansa.