Loron 1 – S. JOSÉ: EMA JUSTU, JEZÚS NIA MESTRE

S. José mak Jezús nia mestre iha buat sira ema nian. Iha aspetu barak Jezús hanesan ho S. José, nia aman hakiak: iha modu serbisu nian no iha ninia karákter”. S. José, ema justu, hanorin nia oan Jezús ho ninia moris justu no onestu.

Prátika: aprende husi S. José sai ema justu no onestu.

 

Loron 2 – EMA SILÉNSIU NIAN

S. José mak ema ida ho liafuan uitoan de’it, nia ko’alia liuhusi ninia hahalok sira no nia halo tuir Anju nia orden sira. Ba Maromak nia orden, José nia resposta mak asaun.

Prátika: Ita aprende husi S. José atu halo silénsiu iha fuan, hodi fó uitoan tempu ba orasaun.

 

Loron 3 – EMA IDA HO ESPÍRITU POBREZA NIAN

José, mane joven no forte, matenek no ho kapasidade, maibé la depende iha ninia forsa no kapasidade sira, ba rikusoin sira mundu nian. Nia hamta’uk Maromak, iha espíritu dependénsia no pobreza nian.

Prátika: Ohin ita aprende husi S. José, konfiansa no dependénsia ba Na’i, iha espíritu pobreza nian.

Loron 4 – HADOMI IHA PUREZA NO KASTIDADE

José mak mane ne’ebé Maromak hili atu fó sasin kona-ba Maria – ida ne’ebé hakotu ona ba nia kaben – nia virjindade no onestidade. Hamutuk ho Maria, sira nia domin ba de’it, Jezús, Maromak nia Oan-Mane ne’ebé entrega ba sira.

Prátika: Ohin ita aprende husi S. José, atu iha matan no fuan moos, tanba ita hateke no hadomi ho Maromak nia matan no nia fuan.

 

Loron 5 – EZEMPLU OINSÁ HATÁN BA VOKASAUN

S. José hatudu oinsá kriatura ida tenke hatán ba Maromak nia planu ba ninia moris, fó kompromisu tomak ba mistériu Enkarnasaun Maromak nia Liafuan nian: nia sai Maria nia espozu, Jezús nia aman, prezide família Nazaré nian. Nia fó apoiu ho nia serbisu, defende no proteje, hodi la halo an nu’udar protagonista, maibé Maromak de’it.

Prátika: Ita aprende husi S. José, dosilidade ba Maromak nia bolun.

 

Loron 6 – MODELU AMAN NIAN

José hakarak husik Maria nonok de’it bainhira deskobre nia ko’us ona, maibé nia simu misaun aman nian. “Família iha nesesidade ba aman ida”, aman ne’ebé prezente iha família, besik nia kaben, atu partilla buat hotu, ksolok no terus, serbisu no esperansa sira. Hamutuk ho oan sira iha sira-nia kreximentu: bainhira sira halimar no hala’o knaar, bainhira preokupa no laran susar, bainhira ko’alia no bainhira nonok, bainhira barani no bainhira ta’uk, bainhira halo ain-hakat sala no bainhira hetan fali dalan loos.

Prátika: Ita aprende husi S. José sai ema ne’ebé hadomi família tuir ida-idak nia estadu (laen/aman, feen/inan, oan).

Loron 7 – EMA KONTEMPLASAUN NIAN

Se ita hanoin ba Maria nia fuan mak fuan kontemplativu, hanesan iha Evanjellu dehan: “Maria fali rai hela liafuan hirak ne’e hotu, hodi hanoin di-di’ak iha nia laran”. ( Lc 2:19, 2:51) fasil liu atu haree katak José mós iha fuan kontemplativu. Ita la rona nia liafuan ida; nia ema kontemplativu no rai buat hotu iha nia laran. Iha buat barak ne’ebé ita bele aprende husi S. José ninia kontemplasaun. Servisu ho di’ak no ninia kompeténsia nu’udar karpinteiru presiza servisu ho hakmatek. Ninia orasaun hari relasaun di’ak ho Maromak. Tan ne’e ita rekoñese katak nia la’os de’it karpinteiru ida, Jezús nia aman, Maria nia kaben. José mak harohan nain ida no iha fiar ne’ebé maka’as iha Maromak.

Prátika: Ita aprende husi S. José atu tau hamutuk orasaun no serbisu; kontemplasaun no asaun.

 

Loron 8 – S. JOSÉ MODELU FORTALEZA NIAN

Fortaleza mak kapasidade atu mantein firme iha difikuldade no konstánsia atu halo di’ak. Ita haree ida-ne’e bainhira Maria atu tuur ahi no uma la iha ka bainhira Maria simu profesia iha templu no nia lae.

Prátika: Ita aprende husi S. José atu sai firme no konstante iha hahalok sira di’ak nian, maski la hetan ema nia konsolasaun.

 

Loron 9 – S. JOSÉ PATRONU UNIVERSÁL KREDA NIAN

Kreda fó onra ba ninia Santu sira,maibé fó kultu partikulár ba S. José, hodi foti nia ba Patronu Universál Kreda nian.

S. José tau matan ba Jezús nia futar Isin fíziku no habosu Nia, hanesan aman di’ak ida fó aihan di’ak ba nia oan sira.

Igreja mak Kristu nia Isin místiku (Corpo Místico de Cristo); Maromak nia Oan mak Ulun invizivel, Amu-Papa mak ulun vizivel no sarani sira mak membru sira ka liman-ain sira.

Bainhira Erodes buka oho Jezús, S. José mak salva nia, hodi lori ba Egipto. Iha Rai ne’e ita haree funu hasoru Igreja Katólika no persegisaun kontínua… Sé mak husi Santu sira soi liu atu proteje Jezús nia Isin Místiku? Konserteza S. José!

Amu-Papa Pio IX, iha 8 Dezembru 1870, bainhira iha Roma, sede Amu-Papa nian, sai alvu ba inimigu sira fiar nian, nia konfia Kreda Universál, ho modu ofisiál, ba S. José, hodi proklama nu’udar Patronu Universál.

Prátika: Ita harohan, atu hanesan S. José, ita fiél to’o rohan nu’udar Kristu Isin Mísitku nia membru sira ho hahalok moris nian.