Dili – Iha loron 14 Marsu 2020 juniores hamutuk nain 21,  hala’o enkontru ida ho madre Assunta,FMA, ho tema husi evangelho Mt 5:1-10, kona ba rahun diak sira. Iha enkontru ida ne’e ami hahu ho orasaun badak ne’ebe guia husi madre Alma Castagna,FMA. Hafoin introdusaun husi madre Assunta, kona ba imajen Maria nia visitasaun ba nia prima iIsabel. Iha kuadro ida ne’e iha Maria, Isabel, Jesus no João, ne’ebe representa enkontru interjerasional ida. Iha ne’e madre sublina elementu ruma ne’ebe hatudu ksolok hodi hala’o ami nia moris konsagrada nian: katak hanesan Maria ne’ebe ba iha familia ida ami mos depois de profisaun tama kedas iha familia relijioza ida. Ho relasaun familia ida ne’e nian madre husu atu ami sai sinal visivel ne’ebe hadomi malu iha diversidade, iha respeitu, domin no simu ema seluk, basa Nai hadomi sira hanesan Nia hadomi hau. Hatene aprende husi ema seluk rikusoin no sabedoria iha moris.

Hotu tiha parte inrodusaun madre kontinua ho fraze evangelho nian kona ba rahun diak sira. Iha parte ida ne’e tulun ami atu tama klean iha ksolok sira ne’ebe evangelho propoin hodi konkretiza iha moris loron-loron nian. Esplikasaun hotu tiha ami fahe iha grupo 4 no serbisu grupo nian ho pergunta ruma husi madre too han meiudia. Han meiudia hotu tiha hahu fali kedas ho apresentasaun grupo nian, hatan perguntas no hatudu drama badak ne’ebe grupo sira prepara ona. Iha konteudu rahun diak sira hodi tau hamutuk espiritu karismatiku ho unidade vokasional. Hotu tiha apresentasaun grupo nian madre haforsa fali ami nia aprentasaun sira hafoin halo konklusaun hodi hatudu video badak ida ne’ebe hatudu modelu servisu hamutuk ka sinodalidade. Ikus liu madre husu ba ami atu la’o hamutuk nafatin maski monu hamrik maibe aprende atu lao ba oin nafatin hamutuk ho irman maluk sira. Hotu tiha madre fahe imagen Amu Papa nian ba ami no halo foto hamutuk hafoin fahe malu.

(Olviana Ina Kii fma)