Dili – Iha loron Domingo, 08 Marsu 20202, iha oras tuku 15:00-16:30, oratorio rua São João Paulo II no Maria Auxilidora Tasi-Tolu ho ksolok no entuziasmo simu Me. Assunta iha sira nia fatin. Me. Assunta halo vizita kanonika iha komunidade São José-Novosiadu Komoro-Dili. Iha vizita ne’e Madre mos hakarak hare Misaun ne’ebe Irman sira halao durante ne’e, entre misaun sira ida mak Oratorio rua ne’ebe Madre ba vizita dadaun.

Iha programa lubuk ida ne’ebe akontese iha momentu ne’e. mak hanesan; Simu Me. Assunta iha sentru oratorio, introdusaun, Orasaun, apresiasaun husi oratorianu no aprezenta programa oratorio nian, aprezentasaun drama “Istoria Istitutu nian” husi oratorio rua, liafuan husi Me. Assunta, kantu agradese nian ba Me. Assunta husi oratoriano sira, fo prezente, foto hamutuk, merenda hamutuk, molok fahe malu dahur hamutuk ho Madre, hafoin fahe malu.

Iha benvinda animadora ida mak hato’o lia fuan Benvida nian, nia dehan: “Bemvinda Madre Assunta iha ami nia fatin oratorio nian ida ne’e. ami sente orgullu tebes ho Madre nia prezensa iha ami nia fatin. Madre nia “prezensa mak grasa no bensaun ne’e ba ami”. Basa iha Madre ami hare Nain Feto Auxiliadora no Madre Mazzarello ne’ebe fo mai ami tulun, korajen, laran manas no ksolok Saleziana nian. Dala ida tan; “mai liu iha ami nia fatin. Benvenuta Cara Suor Assunta!

Iha aprenzentasaun drama, koalia kona Dom Bosco nia vizita ba dahuluk iha Mornese, hahu usi ne’eba mak DB hanoin atu hari’i Istitutu. Nune’e ho  drama hakarak dehan: “Oratorianu sira iha Timor sente importante tebes atu hatene liu tan kona ba Istoria FMA nia moris, basa wainhira hatene didiak mak bele hadomi.  Ho ida ne’e sira hakarak hamutuk ho Madre sira selebra Jubileu istitutu nian, tamba ami foinsae no labarik sira mak ita bo’ot sira iha”.

Hafoin repzentante animadora ida hato’o sira nia apresiasaun no programa oratorio nian: “Iha okaziaun ida ne’e, lori kolega no alin sira hotu nia naran, ami hakarak dehan Obrigada barak uluk nanain ba Maromak ne’ebe fo grasa  DB no MM hodi hari’i Instituto FMA, tuir mai ami agradese ba Madre sira ne’ebe lori Instituto ne’e mai to rai Timor no ikus ami agradese ba Madre no irman sira hotu ne’ebe ho ksolok no entuziasmu mai loke oratorio iha ami nia sentru oratorio rua; MA no JP II. Ohin ami agradese liu-liu ba Me. Assunta ne’ebe ho disponibilidade hakat mai hare ami iha fatin ida ne’e. Hau hakarak dehan, ami sente haksolok tebes ho irman sira nia prezensa domingu-domingu loraik ho ami iha sentru oratori rua, hamutuk ho sira ami aprende buat barak, liu-liu hakbesik-an ba Maromak. Irman sira la hanorin deit kona ba Maromak maibe sira tulun ami integralmente, hanesan fo hanoin mai ami atu komporta diak, sai oan ne’ebe diak iha familia no belun ne’ebe diak iha sosiedade. Tebes iha oratorio ami hakas-an nafatin atu “sai sarani diak no Sidadaun onestu”, tuir DB nia hanorin. Nune’e iha ami nia projetu oratorio nian ba tinan ida ne’e, nia tema mak: “sai sarani diak no sidadaun onestu”. Ami nia objetivu mak: “hamutuk ho foinsae no labarik sira iha oratorio haka’as an atu sai sarani diak no sidadaun onestu iha moris lor-loron nian”. Ami iha tividade lubuk ida mak hanesan: “orasaun, interese grupo, katekeze, formasaun ba simu sakramentu Eukaristia ka Primeira Komuñaun, reza tersu iha fulan maio no Outobru, Via Sakra iha tempu Kuaresma, ba vizita ema ne’ebe presiza halao jogo amizade ho oratorio sira seluk no passeio hamutuk. Ami mos iha formasaun animadores semana-seman iha loron segunda loraik, iha Madre sira nia uma. Ami mos implementa ou halao “ Laudato Si” hodi kontinua hamos ami nia fatin oratorio no tasi ibun ne’ebe besik hodi prezerva fatin ne’ebe mos atu bele halao atividade iha ambiente ne’ebe saudavel. Ne’e mak ami nia programa ne’ebe ami halao nafatin. Maka ne’e deit ba ita bo’ot sira nia atensaun obrigada barak”.

Tuir mai Me. Assunta mos hato’o nia lia fuan: “ Hau haksolok tebes mai vizita imi iha ne’e, hare katak imi haksolok tebes atu tuir atividade sira ne’ebe Madre sira, irman Novisa sira no animadores sira ne’ebe mai halo ba imi. Imi dansa kapas, kanta, halo teatru no aprende buat oi-oin. Atividade ne’e iha mundo tomak FMA sira halo hanesan, ida ne’e sinal katak imi iha sintonia ho maluk sira iha fatin seluk. Ohin iha imi nia aprezentasaun sira imi hatudu katak imi hatene kona ba Kreda no Istituto. Ida ne’e, hau fila fali ba Roma, hau sei dehan ba Reitor Mayor, Madre Jeral no Santo Padre katak imi iha Timor mos moris tuir buat ne’ebe sira dehan. Hau hare imi hasolok, tansa imi haksolok? Labarik sira hatan: ‘Ami haksolok tamba ami mak Maromak nia Oan’. Los, imi dehan los. Ita tenke haksolok duni tamba ita mak Maromak nia oan. Hau husu imi atu kontinua ativu iha oratorio atu sai sarani diak no sidadaun onestu. Obrigada barak ba imi nia akollensia, amizade no ksolok ne’ebe imi hatudu ba hau. Obrigada”

Hafoin sira fo prezente, hasai foto hamutuk, merenda hamutuk no Madre mos dahur ituan ho sira hafoin fahe malu. Obrigada Barak.

(Husi: Resposavel Oratorio Tasi-Tolu)