Papa Francisco nia mensajen molok reza Angelus 8 Marsu 2020

Maun no biin-alin sira, bondia!

Estrañu uitoan orasaun Angelus nian ida-ne’e, ho Papa “iha gaiola” biblioteka nian, maibé ha’u haree imi, ha’u besik ba imi. No ha’u hakarak mós hahú hodi agradese grupu ne’ebé iha Prasa ne’ebé manifesta no luta ba “Sira ne’ebé ema haluha iha Idlib”. Obrigadu! Obrigadu ba buat ne’ebé imi halo. Maibé modu atu harohan Angelus ohin nian ita halo atu kumpre dispozisaun preventive sira, nune’e evita grupu ki’ik ninia halibur malu, ne’ebé bele favorese transmisaun virus nian.

Evanjellu domingu daruak Kuarezma ne’e nian (kf Mt 17,1-9) aprezenta mai ita istória Transfigurasaun Jezús nian. Nia lori Pedro, Tiago no João no sae ba foho aas ida, símbolu prosimidade ho Maromak, atu loke sira ba komprensaun di’ak liután mistériu ninia An nian ne’ebé tenke terus, mate, no hafoin moris hi’as. Defaktu, Jezús hahú ko’alia ba sira kona-ba terus, mate no moris-hi’as ne’ebé hein sira, maibé sira la simu perspetiva ida-ne’e. Tanba ne’e, to’o tiha iha foho, Jezús tama iha orasaun laran no nakfilak An iha dixípulu na’in tolu nia oin: «nia oin – Evanjellu dehan – nabilan hanesan loron no ninia hatais mutin hanesan naroman» (v. 2).

Liuhusi eventu furak Transfigurasaun nian, dixípulu nain tolu simu bolun atu rekoñese Jezús Maromak nia Oan nabilan iha glória. Nune’e sira avansa iha koñesimentu sira-nia Mestre nian, hodi konxiente katak aspetu umanu la esprime realidade tomak; ba sira-nia matan hatudu dimensaun  ultraterrena no divina Jezús nian. No husi leten mosu lian ida ne’ebé dehan: «Ne’e mak ha’u-nia Oan, ne’ebé ha’u hadomi […]. Imi rona nia bá» (v. 5). Aman lalehan mak konfirma “investidura” – ita hanaran nune’e – Jezús nian ne’ebé halo ona iha loron batizmu iha Jordão no konvida dixípulu sira atu rona no tuir Nia.

Presiza subliña katak, iha grupu Sanulu-resin-rua nia leet, Jezús hili atu lori ba foho Pedro, Tiago no João. Nia rezerva ba sira priviléjiu atu asiste transfigurasaun. Maibé tanba sá halo eleisaun ba na’in tolu ne’e? Tanba sira mak santu liu? Lae. Maski nune’e, Pedro, iha oras prova nian, sei nega Nia; no maun-alin Tiago no João husu atu iha fatin dahuluk iha ninia reinu (kfMt 20,20-23). Jezús la hili tuir ita-nia kritériu sira, maibé tuir ninia planu domin nian. Jezús nia domin la iha sasukat: ne’e mak domin, no Nia hili tuir planu domin ne’e. Ne’e mak hilin gratuitu, inkondisionál, inisiativa livre ida, amizade divina ida ne’ebé la husu selu. No hanesan Nia bolu dixípulu na’in tolu ne’e, nune’e mós ohin Nia bolu ema balun atu besik ba Nia atu bele fó sasin. Sai Jezús nia sasin mak don ida ne’ebé ita la merese: ita sente la bele, maibé ita labele hakiduk ho deskulpa ita-nia inkapasidade nian.

Ita la bá iha foho Tabor, ita la haree ho ita-nia matan Jezús nia oin nabilan hanesan loron. Maski nune’e, mai ita mós entrega hela Liafuan salvasaun nian, haraik mai ita fiar no ita esperimenta, ho forma lahanesan, ksolok enkontru nian ho Jezús. Mai ita mós Jezús dehan: «Hamriik bá no keta ta’uk» (Mt 17,7). Iha mundu ne’e, ne’ebé marka ho egoízmu no kaan, preokupasaun loroloron nian taka tiha Maromak nia naroman. Dalabarak ita dehan: ha’u la iha tempu atu reza, ha’u labele hala’o servisu ida iha parókia, atu hatán ba ema seluk nia pedidu sira… Maibé ita keta haluha katak Batizmu ne’ebé ita simu halo ita sai sasin, la’ós ba ita-nia kapasidade sira, maibé tanba don Espíritu nian.

Iha tempu propísiu Kuarezma nian, Virjen Maria harohan daet atu ita hetan dosilidade ba Espíritu, ne’ebé indispensavel atu ita la’o ho rezolusaun iha dalan konversaun nian.