Baucau – Kreda bolu ita atu halakan fali vokasaun misionária, sai bá hasoru ema sira, foin-sa’e sira, família sira, sai komunidade iha liña frente nian, nakloke no aten-barani atu, nu’udar Kreda, ita la’o ba periferia ezistensiál sira.

Irmán FMA sira iha komunidade S. Teresa d’Ávila husi kedas fulan Janeiru mak sai ba hasoru família sira, nu’udar sélula fundamentál sosiedade no Kreda nian atu koñese liután maun-alin sira-ne’e nia moris, dezafiu sira ne’ebé sira enfrenta no difikuldade sira nune’e sai ba sira prezensa ida konsolasaun Maromak nian ba sira. Sira remata vizita ona família sira iha Sentru Maria Auxiliadora no agora vizita daudaun família sira iha Sentru Vila Santo António.

Iha enkontru ho família sira, ita haree preokupasaun oioin ne’ebé sira enfrenta maibé uluknanai ita haree krize fiar nian. Família barak mak kahur fiar katólika ho fiar tradisionál, no iha balun mós mak fiar iha podér nakukun nian. Iha kultu espesiál ba matebian sira ne’ebé ema hamta’uk liufali Maromak: “Maromak perdua, maibé matebian sira la perdua”. Aleinde ne’e, bainhira hasoru moras, ema buka uluk matan-dook molok ba ospitál, ne’ebé pratika espiritizmu hodi halo kontaktu ho espíritu sira inklui matebian nian. Piór liután mak uza buat ne’e atu halo aat ba ema seluk eh deskonfia ema seluk mak halo aat, nune’e kria ódiu, vingansa entre maluk no ema sira. Sarani barak fiar katak moras nia kauza mak espíritu sira matebian nian eh espíritu aat sira. Defaktu, iha ami-nia vizita sira ami konstata foin-sa’e ruma ne’ebé moras no sintoma prezensa malignu, fila kotuk no lakohi haree irmán nia prezensa, taka tilun hodi hakilar lakohi rona bainhira reza ba nia, losu matan… Ita bele duni katak iha forsa nakukun ne’ebé haterus ema ne’e.

Iha sarani balun ne’ebé hadook an husi Kreda. Sira iha fiar maibé sira-nia fiar hela de’it iha memória infánsia nian, relijiaun nu’udar prátika ida ba labarik sira iha sira-nia prosesu dezenvolvimentu to’o bainhira sai boot. Sai boot ona, katak sai ona veteranu ida prátika relijioza nian,  la presiza ona Kreda, basá tuir sira-ne’e “Maromak iha fatin hotu-hotu no ita bele reza ba Nia iha fatin hotu”. Interesante mak ema sira-ne’e sai alvu uluk liu aprosimasaun husi seita sira, maibé sira mak ida uluk atu diskute ho “katuas” sira seita Jeová nian hodi defende sira-nia relijiaun katólika.

Ida-ne’e hatudu katak iha falta iha esperiénsia sarani auténtika iha enkontru pesoál no komunitária ho Kristu, ne’ebé la to’o de’it ho koñesimentu doutrina nian. Papa Francisco iha ninia katekeze loron 25 Juñu 2014 hateten katak ema sarani la mesak iha ninia identidade: “Se naran mak ‘ha’u ema sarani’, apelidu mak ‘ha’u hola parte ba Igreja’. Ita-nia identidade mak , hola parte” ba Kreda, Kreda mak hahoris fiar iha ha’u.

Tanba ne’e importante liu papél inan-aman sira nian no familiár sira seluk nian iha tranzmisaun fiar nian. Iha família, Kreda doméstika, mak ita simu fiar no “ita aprende atu moris nu’udar sarani no nu’udar Na’i Jezús nia dixípulu sira”.

Família barak preokupa tebes ho foin-sae sira nia situasaun…Sira sente kbiit-laek iha sira-nia knaar edukasaun nian tanba iha ajénsia edukativa seluk ne’ebé dada liu foin-sa’e sira: internet no grupu; sira hakarak delega hotu ba eskola katólika sira, ne’ebé iha Baucau iha ida de’it tanba sira la fiar eskola públika sira. Maibé loloos oan sira nia edukasaun mak responsabilidade primária inan-aman nian.

Ho aprosimasaun ba família sira, FMA sira haka’as an atu sira-nia prezensa sai prezensa kualidade nian atu hametin no konfirma família sira-nia fiar sarani no sai apoiu iha sira-nia difikuldade no akompañamentu iha sira nia knaar inan-aman nian.