Dili – Molok hahú Vizita Kanónika,  ohin, 3 Marsu, Ir Assunta Sumiko Inoue – reprezentante Superiora nian husi Roma – aprezenta ba diretora sira komunidade nian kona-ba vizita kanónika nia signifikadu, finalidade, oinsá ninia lala’ok. Tuir Konstituisaun FMA, “Superiora Jerál” sei vizita pesoalmente ka liuhusi Konselleira Jerál Inspetoria sira ho finalidade atu hametin vínkulu karidade nian; habiit empeñu fidelidade nian ba Konstiituisaun sira, favorese kreximentu iha obra sira iha espíritu Don Bosco no Madre Mazzarello nian.

Pergunta tolu ba diretora ida-idak atu reflete no fahe iha grupu mak tuirmai ne’e: aspetu ne’ebé mportante atu moris durante vizita kanónika nu’udar esperiénsia enkontru pesoál no komunitária; dezafiu boot sira ne’ebé provoka vida komunitária; espetativa no proposta sira ba vizita kanónika.

Aspetu importante atu hala’o vizita komunidade nu’udar esperiénsia enkontru pesoál no komunitáriu uluknanai mak abertura no dixernimentu, hodi  rona Espíritu Santu nia inspirasaun sira, iha klima orasaun;  liberdade espresaun nian; moris espíritu família nian.

Dezafiu sira iha nivel komunidade nian mak difikuldade atu moris Sistema Preventivu liuliu “amorevolezza” salesiana, la iha delikadeza; dezafiu sentidu hola-parte nian; dezafiu misaun nian, tanba la iha fatin atu halibur foin-sa’e sira; moris komodizmu, ne’ebé lakohi atu foin-sa’e sira disturba durante oratóriu, formasaun ba foin-sa’e sira; hein ema seluk serví; menus sentidu hola-parte, liuliu interese ba atividade nivel inspetoriál ka jerál; la valoriza kolókiu, ba Irmán perpétua sira; iha komunidade Cailaco la iha Missa iha semana laran, domingu de’it, nst.

Espetativa sira ne’ebé Irmán sira fó sai mak ho vizita ida-ne’e bele lori mudansa ka konversaun pesoál no komunitária, reforsa Irmán sira-nia fidelidade ba karizma, entuziazmu ba misaun. Dezafiu urjente liu mak kolókiu, no tuir Ir Assunta, “ema ne’ebé dehan nia la iha problema, nia problemátika tanba nia la halo dalan”, la iha planu pesoál kreximentu nian.

Iha loraik Ir Assunta halibur diretora sira hamutuk ho ekipa Ámbitu sira-nian. Momentu dahuluk fó ba Ámbitu ida-idak atu aprezenta sira-nia an, objetivu no programa. Momentu daruak Ir Assunta aprezenta ninia tópiku formasaun nian hahú hodi halo diferensa entre “kolaborasaun no distribuisaun”. Iha distribuisaun bele iha rezultadu orden, programa di’ak maibé ita la hatene ema seluk halo saida. Iha kolaborasaun ita haree buat ne’ebé ema seluk halo, kolabora ba finalidade ida ho estilu ne’ebé favorese diálogu no sinerjia.

Depoizde ida-ne’e, Ir Assunta aprezenta kona-ba perfíl lider nian tuir estilu evanjéliku salezianu. Hafoin, nia husu atu iha grupu ki’ik-oan, fahe no haree sá loos perfíl ne’ebé tuir ida-idak importante liu. Ikusmai Ir Assunta realsa importánsia kona-ba lider ne’ebé hatene deside, no husu atu ida-idak “tau iha ninia projetu pesoál dalan atu sai lider ida ne’ebé buka hari’i hamutuk Inspetoria ida ksolok no jenerativa”.

(ComSoc FMATIN)