Dili – Ir Assunta Sumiko Inoue ohin, 2 Marsu, simu postulante na’in lima ne’ebé husu atu kontinua sira-nia formasaun iha prosesu sai “Filha de Maria Auxiliadora”. Postulante foun sira ne’e makInocência dos Santos (Asalaino/Lospalos), Izolina Maia Lopez (Cailaco/Maliana), Lucia Bidoe Monteiro (Laclubar/Manatuto), Novia Lestari Daili (Pulau Nias/Sumatra Utara), Veronica da Conceição (Atsabe/Ermera). Sira-nia motto foti husi pasajen evanjélika S. João nian: “Ida ne’ebé haruka ha’u mai hela ho ha’u; Nia la husik ha’u mesak” (8,29b).

Iha ninia liafuan sira, Ir Assunta dehan ba Postulante foun sira katak, dalan postulante fulan sanulu la’ós pasajen ida de’it, pasajen automátiku ida, maibé “tempu atu prepara an atu tama novisiadu”. Nia dehan katak, “Igreja estabelese tempu preparasaun ida-ne’e ba novisiadu, tanba novisa sai membru ofisiál Institutu nian”. Iha diferensa “ki’ik no boot” entre postulante no novisa. Bainhira sai novisa, sira iha ona naran iha “elenco Institutu nian”. Nune’e, Ir Assunta husu atu postulante sira “aproveita didi’ak fulan sanulu ne’e”. Nia dehan tan katak loloos “dalan ba kreximentu vokasionál dura ba moris tomak, maibé períodu ida-idak iha ninia signifikadu própriu”. Iha etapa ida-idak ita presiza buka atu hakle’an didi’ak, liuliu iha etapa postulantadu,  buka haklean vokasaun ne’ebé simu.

Tuirmai, Ir Assunta fó konsellu atu “hakle’an orasaun, nu’udar enkontru pesoál ho Jezús… Buka koñese didi’ak Jezús, ko’alia beibeik ho Jezús, no haka’as an atu sai feto furak, di’ak iha Jezús nia oin”. Nia dehan ba sira katak, Irmán sira hotu sei tulun no suporta sira iha sira-nia dalan ho ksolok no fuan nakloke.

(ComSoc FMATIN)