Sarani nia hola parte ba Kreds mak tema katekeze husi Papa Franciso iha kuarta, 25 Juñu iha Prasa S. Pedro. Amu-Papa koninua siklu katekeze  nian kona-ba Igreja, hahú iha semana kotuk.

Asesu Katekeze ho lia-portugés

Ema sarani la mesak, hodi moris mesmesak ninia identidade, Papa Francisco esplika. “Se naran ‘ha’u ema sarani’, apelidu mak ‘ha’u hola parte ba Igreja’. Ita-nia identidade mak hola parte”.

Amu-Papa  fó hanoin kona-ba sentimentu gratidaun ne’ebé tenke hakonu ema sarani nia moris, nune’e nia bele rekoñese serbisu ne’ebé ema sira mai molok nia halo no simu nia iha Kreda. Ida-ne’e tanba, ema ida la sai sarani mesmesak, iha  laboratóriu ida, maibé hodi halo parte ba povu ida.

“Se ita fiar, se ita hatene harohan, se ita koñese Na’i no bele rona Ninia Liafuan, se ita sente Nia besik no rekoñese Nia iha maun no biin-alin sira, ne’e tanba, molok ita, sira moris fiar no, hafoni, tranzmite mai ita”.

Amu-Papa destaka papél inan-aman sira nian no familiár sira seluk nian iha tranzmisaun fiar nian. Iha Papa Francisco rasik nia moris, nia hanoin kona-ba irmán relijioza ida ne’ebé hanorin nia Katesizmu. “Ida-ne’e mak Igreja: família boot ida, iha ne’ebé ema simu ita no ita aprende atiu moris nu’udar sarani no nu’udar Na’i Jezús nia dixípulu sira”.

Dalan ida-ne’e ema bele moris, la’ós de’it tanba ema seluk, maibé mós hamutuk ho ema seluk. “Iha Igreja, la eziste ‘hala’o mesak’, la eziste jogadór sira iha funsan ‘livre’ nian. Dala hira, Papa Bento deskreve Igreja nu’udar ‘ita ekleziál’ ida”, Papa Francisco hatutan.

Amu-Papa remata katekeze hodi husu Na’i-Feto grasa atu keta monu ba tentasaun hodi hanoin katak ita bele haketak an husi ema seluk no husi Igreja, hodi salva an mesak. “Iha kontráriu, ita labele hadomi Maromak hodi la hadomi maun-alin sira iha Igreja nia li’ur; ema labele hela iha komuñaun ho Nia hodi la hela iha komuñaun ho Igreja, no ita labele sai sarani di’ak se ka’ós hamutuk ho ema hotu ne’ebé buka tuir Na’i Jezús, nu’udar povu ida de’it, isin ida de’it”.

Ne’e mak katekeze ikus fulan Juñu nian. Ho períodu tradisionál repouzu nian durante bailoron iha Europa, iha fulan Jullu ne’e, Papa Francisco sei hahú fali audiénsia jerál sira iha fulan Agostu.