Venilale – Dimensaun misionária Ad Gentes mak dimensaun ida FMA nian. Inspetoria FMA Timor-Indonesia moris dimensaun ida-ne’e, no iha ona misionária FMA Timor-Oan  nai’n tolu mak sai misionária. Ida, Ir Fernanda ne’ebé serbisu iha Rai South Africa”, Ir Isabel no Ir Úrsula ne’ebé servisu iha Rai Brasil.

Iha fulan Janeiru, ami iha Ir Fernanda ne’ebé fahe esperiénsia misionária ho estudente balun no, ohin dadeer iha  Ir. Ursula Guimarães, ne’ebé fahe ninia esperiénsia misionária iha Mato Grosso, Brasil.

Partisipa ba  enkontru partilla ida-ne’e komunidade Edukativa: estudante ETV Mazzarello, mestre/a no mós ba Irmán sira hotu. Objetivu atu loke tan foin-sa’e sira-nia neon ba obra saleziana iha nasaun seluk, no motiva sira ba voluntariadu no solidariedade, nune’e mós ba deskoberta vokasaun rasik.

Furak tebes bele haree Ir Úrsula ninia entuziazmu misionáriu, fahe oinsá FMA No SDB servisu hamutuk atu vizita misaun sira. Iha rejiaun ida iha Mato Grosso, sira halo misaun itinerante, hodi vizita aldeia 50, kada aldeia ba loron 15. Iha ninia partilla bele haree oinsá sira hadomi no respeita povu indíjena sira, inkultura sira-nia moris tuir povu sira, fahe Maromak nia liafuan ba sira, povu tribu sira nian ne’ebé mafia, ema riku sira hakarak hamohu no hadau sira nia rain. Ema sira-ne’e oho amlulik ka relijioza sira ne’ebé defende povu sira-ne’e ninia  dignidade no direitu, inklui salezianu ida ne’ebé agora iha hela prosesu ba beatifikasaun.

Ho esperiénsia ne’ebé ami rona bele tulun ami la’ós hanoin de’it ami nia an maibé aprende atu hanoin mós ema seluk. Ir. Úrsula konvida foin-sa’e sira atu oferese an ba volontariadu, maski la sai amlulik ka relijioza, hodi bele sai bá li’ur, to’o iha  Brasil no moris vokasaun sarani loloos. Buat ida ami bele halo daudaun  mak bele intesifika liután ami nia orasaun ba rai misaun.

(ComSoc FMATIN)