“Tempu atu hakribi liafuan folin-laek, tempu atu loke Bíbila”

Sidade Vaticano – Iha ninia katekeze, iha Kuarta “Cinzas”, 26 Fevereiru 2020, Papa Francisco hato’o kona-ba signifikadu rai-fuik, mai ita hotu, maski balun moris iha sidade, no konvida sarani sira atu imajina katak sira horik iha rai-fuik. “Sensasaun dahuluk mak ita sente silénsiu boot ida falun ita: lahó barullu, anin de’it no ita-nia respirasaun”, nia hateten.

“Rai-fuik mak fatin iha-ne’ebé ita foti distánsia husi barullu ne’ebé haleu ita. Auzénsia liafuan nian atu fó espasu ba Liafuan seluk, Maromak nia Liafuan, ne’ebé hamaus ita-nia fuan hanesan anin malirin ne’ebé kmaan ida. Rai-fuik mak fatin Liafuan nian, ho letra boot. Iha Bíblia, Na’i gosta ko’alia ho ita iha rai-fuik. Iha rai-fuik, Nia entrega ba Moisés “liafuan sanulu”, ukun-fuan sanulu sira. No bainhira povu hadook an husi Nia, sai hanesan noive infiél, Maromak dehan: «Ha’u sei lori nia ba rai-fuik no manán nia fuan. Iha-ne’ebá nia sei hatán, hanesan iha loron sira ninia juventude nian». Iha rai-fuik, rona Maromak nia Liafuan, hanesan lian kmaan ida”.

Tempu hakbesik an ba Na’i

Papa Francisco hatutan katak, iha rai-fuik ita bele iha intimidade ho Maromak, domin Na’i nian. Nia fó hanoin katak Jezús gosta retira an loroloron ba fatin fuik atu harohan no hanorin buka Aman, ne’ebé ko’alia iha silénsiu.

“Kuarezma mak tempu di’ak atu loke espasu ba Maromak nia Liafuan. Tempu atu desliga televizaun no loke Bíblia. Tempu atu desliga telefone selulár no konekta an ho Evanjellu. Tempu atu hakribi liafuan folin-laek, ko’alia oan sira, konta ema, fofoka, gossip, no hakbesik an ba Na’i”.

Papa Francisco dehan tan katak Kuarezma mak tempu atu dedika an ba ekolojia saudavel fuan nian, “halo limpeza ida iha nia laran”:

“Ita moris iha ambiente ho poluisaun tanba violénsia verbál, ba liafuan barak ne’ebé ofende no halo aat, ne’ebé rede amplifika. Ohin, ema insulta hanesan dehan ‘Bondia’. Ita mout iha liafuan mamuk sira, publisidade sira no anúnsiu falsu sira. Ita akostuma an atu rona buat hotu no ita iha risku atu monu iha mundanizmu ne’ebé atrofia ita-nia fuan sira. Ita sente difisil atu distinge Na’i nia lian ne’ebé ko’alia mai ita, lian konxiénsia nian, di’ak nian. Jezús, hodi  bolu ita iha rai-fuik, konvida ita atu fó atensaun iha buat ne’ebé vale, iha buat ne’ebé importante, iha esensiál”.

Ba diabu ne’ebé babeur nia, Jezús hatán: “Ema la moris de’it ho paun, maibé husi liafuan hptu ne’ebé sai husi Maromak nia ibun”. “Liufali paun, ita presiza Maromak nia Liafuan, ita presiza ko’alia ho Maromak: harohan”, Amu-Papa dehan.

Fatin esensiál

Amu-Papa afirma tan katak rai-fuik mak “fatin esensiál” atu deskobre hikas buat ne’ebé importante. “Ita hateke ba ita-nia moris: sasán folin-laek hirak haleu ita. Ita tuir buat rihun-rahun ne’ebé parese nesesáriu, maibé iha realidade la’e ida. Di’ak mai ita atu liberta an husi realidade naresin barak atu deskobre hikas buat ne’ebé vale no hetan hikas ema ne’ebé iha ita-nia sorin”.

Papa Francisco hatudu katak, Jezús fó ezemplu kona-ba ida-ne’e, hodi halo jejún. “Jejún” katak hatene hakribi sasán folin-laek, naresin, atu bá iha esensiál. Halo jejún la’ós de’it atu sai krekas, halo jejún katak bá iha esensiál. Buka beleza moris simples nian”, nia subliña.

Fatin solidaun nian

Ikusmai, Papa Francisco dehan katak rai-fuik mak “fatin solidaun nian”. “Ohin loron mós, besik ita, iha fatin sira ne’ebé fuik, ema barak moris mesak. Ema sira ne’ebé mesak no abandonadu. Ema kiak no katuas-ferik hirak mak iha ita-nia sorin moris iha silénsiu, lahodi halo barullu, marjinalizadu no ema soe![…] Rai-fuik lori ita bá sira, ba sira ne’ebé, iha silénsiu, husu ita-nia tulun iha silénsiu. Iha hateken barak iha silénsiu ne’ebé husu ita-nia tulun. Dalan rai-fuik kuarezmál mak dalan ida karidade nian ba ema vulneravel sira. Orasaun, jejún no obra karidade sira: ne’e mak dalan rai-fuik kuarezmál”, nia remata.

(Vatican news-Redasaun fmatin)