Kuarta “Cinzas” (akudesan)
Ho Kuarta “Cinzas” hahú Kuarezma, períodu ne’ebé mai molok Páskua, no ne’e mak loron jejún no abstinénsia husi naan, abstinénsia ne’ebé Kreda husu sesta hotu tinan nian maibé ita haree katak iha dékada sira ikus nian redús de’it ba sesta Kuarezma nian. Loron seluk jejún no abstinénsia nian mak Sesta Santa.
«Memento homo, quia pulvis es et in pulverem reverteris», ka: «Ema, hanoin bá katak ó rai-rahun no sei fila ba rai-rahun». Liafuan sira-ne’e mosu iha Génesis 3,19 bainhira, Adão ho Eva Maromak duni sai husi Éden depoizde halo sala orijinál, kondena ba serbisu rai nian no ba mate.
Orijen
Tuir prátika antiga, sakramentu peniténsia buat ida públiku no nia defaktu, ritu mak fó inísiu ba dalan peniténsia sarani sira nian ne’ebé sei hetan absolvisaun iha dadeer Kinta Santa. Hafoin, jestu tau akudesan – ne’ebé ita hetan hodi sunu ramus sira ne’ebé amululik bensa iha Domingu Ramus tinan kotuk nian – habelar ba sarani sira hotu no hatama iha Missa nia laran, remata tiha omilia. Fórmula ne’ebé akompaña mós, muda iha tempu: iha ninia orijen dehan nune’e: “hanoin bá katak ó rai-rahun no sei fila ba rai-rahun”, foti husi livru “Génesis”. Depoizde reforma litúrjika, Konsíliu Vaticano II nian, muda tiha fraze ba: «Hakribi salan no fiar Evanjellu» (Mc 1,15) ne’ebé esprime aspetu penitensiál no aspetu pozitivu Kuarezma nian, katak tempu konversaun nian, orasaun badinas iha Maromak nia oin.
