Venilale –  Iha loron 23-02-2020, husi tuku 08.30 dader  labarik no foin-sa´e husi oratoriu sentru tolu: Lia waiho´o, Waibua no Waihaco mai tuir misa iha parokia Sagrado Coraçao de Jesus  ho objetivu atu hahu fali oratoriu ba tinan 2020 nian. Depoizde misa sentru 3 ne´e hamutuk ho orfanato São Domingos Savio, halibur iha salaun parokia nia oin atu hahu atividade sira ho orasaun no animasaun ne’ebé prepara tiha ona, labarik sira hamutuk 350.

Madre Cecilia del Mundo hato´o mensajen ba oratoriano hotu hodi fó hanoin ba sira kona  ba loron abertura ne’e mak oportunidade ida atu selebra loron ksolok amizade nian no madre husik ba sira liafuan H3 tolu katak: habelun, halimar no haksolok. Rona tiha mensajen husi madre, MC konvida madre Cecilia no reprezentante  husi Komunidade  edukativa , labarik nain 4, irmán Virgilia Gaio no Aspirante Esmeralda atu halo fera balaun nu’udar simbolu abertura oratoriu nian.

Tuirmai ho entuziasmu sira hotu tuir ho ksolok jogos oi-oin ne´ebé oferese ba sira ida-idak tuir sira nia klase; jogus sira mak hanesan: uza ibun sodi buka osan iha trigu laran, ba merkadu, soe be iha plastik, tata kanuru ho berlindos iha laran, kesi ain ho tali mak halai, han krupuk, enxe bee ba botir no pasa borraxa uza sedotan; jogus remata manan nain sira simu ida-idak nia premiu ho kontente hafoin han meiu dia hamutuk. Ikus liu taka ho jogu amizade basketball feto: oratoriano waibua kontra orfão sira no football mane: Lia Waiho’o  kontra Waibua, hafoin fahe malu.

 

(Cesarina Correia FMA)