Papa Francisco bá iha Bari (Itália) iha 23 Fevereiru 2020, atu partisipa iha enkontru ne’ebé “CEI” (Conferenza Episcopale Italiana) realiza ho Bispu sira ‘Mediterrâneo’ nian, iha Bazílika S. Nicolau, iha Bari, rejiaun italiana Puglia nian, iha tasi-mane Península nian, kona “Reflesaun no espiritualidade “Mediterráneu, fronteira damen nian”.

Tuimai ninia liafuan molok Angelus.

Maun no biin-alin sira,

Enkuantu ita halibur iha ne’e atu reza no reflete kona-ba damen no povu sira ne’ebé hakbesik Mediterráneu nia sorte, iha tasi ida-ne’e nia sorin balun bá, ho modu partikulár iha noroeste Síria nian, akontese daudaun trajédia boot ida.  Husi ami-nia fuan bibi-atan nian hasae apelu forte ida ba atór sira ne’ebé envolve iha buat ne’e no ba komunidade internasionál, atu halo nonok kilat sira nia tarutu maka’as no rona ki’ik-oan sira no sira ne’ebé labele defende an ninia tanis; atu tau ba sorin kálkulu no interese sira atu proteje ema sivíl sira nia moris no labarik inosente wain ne’ebé selu konsekuénsia sira.

Ita harohan Na’i atu book fuan sira no hotu-hotu bele supera lójika konfrontasaun nian, ódiu nian no vingansa nian nune’e deskobre hikas katak ita hotu-hotu mesak maun no biin-alin, oan sira husi Aman ida de’it, ne’ebé halo loron mosu ba sira ne’ebé di’ak no sira ne’ebé aat )kf Mt 5,45). Mai ita invoka Espíritu Santu atu ita ida-idak, hahú husi jestu loroloron domin nian, kontribui atu harii relasaun foun sira, hodi hetan inspirasaun ba komprensaun, simun, pasiénsia, hodi nune’e tau kondisaun sira atu esperimenta kslok Evanjellu nian no habelar iha ambiente ida-idak moris nian. Atu Virjen Maria, “Fitun Tasi nian” [Maromak Inan Santa] ne’ebé ita hateke nu’udar ezemplu, tulun ita la’o iha lurón ida-ne’e.

Molok resita Angelus hamutuk, ha’u agradese husi fuan Bispu sira hotu no hotu-hotu ne’ebé partisipa iha enkontru kona-ba Mediterráneu nu’udar fronteira damen nian; nune’e mós sira ne’ebé – no barak tebes! – ho modu oioin serbisu atu bele iha ézitu di’ak. Obrigadu bai mi hotu! Imi kontribui atu halo buras kultura enkontru nian no diálogu nian iha rejiaun ida ne’ebé importante liu ba damen iha mundu.