Papa Francisco nia katekeze

Papa Francisco hahú , iha kuarta, 18 Juñu, siklu foun katekeze nian kona-ba Kreda. Santu Padre enfatiza definisaun Kreda nian nu’udar povu ida Maromak kria nu’udar família, hodi repete fali katak nia la’ós ONG ida, la’ós mós instituisaun ida ho finalidade ba an rasik.

Asesu Katekeze ho lia-portugés

Ko’alia kona-ba Kreda, tuir Papa Francisco, katak ko’alia kona-ba inan rasik, família rasik; labele hanoin de’it kona-ba kleru eh Vaticano. Kleru mak parte Kreda nian, maibé ralidade ne’e boot liután, loke ba umanidade tomak.

“Kreda la moris iha laboratóriu, la moris derepente. Jezús mak harii nia, maibé nia mak povu ida ho istória naruk no preparasaun ida hahú tempu  naruk molok Kristu rasik”.

Papa Francisco esplika katak, iha Abraão, Maromak hahú povu ida ne’ebé lori Ninia bensan ba família hotu rai nian, maibé ne’e inisiativa Maromak rasik nian. Nune’e , Maromak forma povu ida ne’ebé konfia iha Nia no halo dalan.  Dala barak,  ema egosita no fuan toos, situasaun sira  ne’ebé se iha arrependimentu, sei hetan Maromak nia perdaun.

“Ida-ne’e duni mak halo ita buras nu’udar Maromak  nia Povu, nu’udar Kreda; la’ós hodi ita nia abilidade, ita-nia méritu sira, maibé  liuhusi es[eriénsia ne’ebé ita loroloron halo kona-ba oinsá Maromak hadomi tebes ita no tau matan mai ita”.

Amu-Papa taka katekeze hodi husu atu sarani sira sai fiél nafatin ba Jezús Kristu no rona ninia Liafuan.