Laga – Komunidade Beata Laura Vicuña Laga sentru oratóriu iha neen. Tolu iha parte tasi nian mak hanesan; Binagua, Buigira no Tequinomata, ida mak sentru Tomagua ho orfan sira no rua seluk parte foho nian mak hanesan; sentru Nunira no Samalari Laga. Sentru sira seluk kontinua ativu tinan-tinan, maibé sentru Oratório Samalari mak loke iha 2017 maibé para de’it iha 2018 klaran tan motivu oinoin.

Tinan ida-ne’e komunidade deside hamutuk loke fali. Nune’e iha loron 9 fevereiru tinan ne’e Irmán sira ba hasoru dahuluk hodi informa konaba atu loke fali oratóriu hanesan tinan rua liuba. Haree katak ema kontente tebes ho Irmán sira nia prezensa. Nune’e ohin iha loron 16 Fevereiru ofisialmente loke fali oratóriu iha sentru Samalari nian. Programa ne’ebé realiza mak hanesan, tuku 8:00 Otl dadeer halibur hamutuk, jogos livre no animasaun to’o tuku 9:45 Otl, pauza oituan prepara an ba santa Misa. Tuku 10:00 Misa hamutuk. Misa hotu tiha kontinua fali atividade oratóriu nian. Hahú ho orasaun abertura nian, reflesaun ba Evanjellu, tuir mai mak Animasaun no Jogos sira. Jogos sira maka hanesan; pasa fatuk ho ain, pasa boraxa ho kesak husi ibun, pasa fatuk ho kopu acqua nian ho ulun, berlindus ba ki’ik sira. Hotu tiha fahe prémiu ba manán na’in no fahe rebuxadu ba hotu-hotu, hafoin ida-idak ba nia grupu bolu no tau naran ba sira ne’ebe foun, reza hamutuk no fila ba uma ho ksolok.

Sarani sira, labarik no foin-sa’e sira husi oratóriu nian, mestre-mestra sira, katekista ema hotu kontente ho irmán no animadór sira nia prezensa.  Irmán nain 2 hamutuk ho animadór sira na’in 8. Ohin hah’u ho labarik no foinsa’e hamutuk na’in 90. Ita reza no espera atu semana-semana kontinua aumenta. Nune’e mós Irmán no animadór sira persevera no fiel lori ba oin nafatin atividade oratóriu ne’e.

(Anita Freitas, FMA)