Laga – Baibain iha komunidade Beata Laura Vicuña Laga kada kinta lorokaraik, iha formasaun ba grupu Asosiasaun nian. Ohin loron 13 Fevereiru, loron komemorasaun madre Mazzarello nian, grupu madre Mazzarello troka oituan ambiente formasaun la’ós iha komunidade maibé ba iha tasi. Nune’e depoizde menina sira sai husi eskola tuku 13.00 Otl, fila ba uma prepara an no ba iha tasi Wataboo nian. Sai husi uma tuku 13.30 Otl, to’o iha tasi tuku 14.30, han meiudia nian iha tasi, hafoin tuku 15:00-16:00 Otl,  menina sira hariis hafoiin tuku 16:15 reza hamutuk no formasaun bazeia ba  Surat Madre Mazzarello nian mak hanesan “Dehan ba Na’i atu haraik tempu ba o atu sai santa hodi manan klamar barak ba Nia. Haksolok nafatin sai di’ak liu tan, servisu ho laran no halo buat hotu ba Jezus no reza atu loron ida ita hotu bele hasoru malu iha lalehan” (Surat 19). Fraze seluk mak  “Atu haksolok nafatin ita presiza la’o ba oin ho simplisidade, la buka ksolok husi nein krietura sira, nein husi sasan mundu ne’e nian. Hanoin de’it atu hala’o didi’ak ita nia knaar tamba domin ba Jezus no keta hanoin buat seluk” (Surat 24).

Formasaun hotu tiha kontinua ho fo prezente ba malu tan nu’udar grupu ami antisipa selebra loron Valentine hamutuk, iha loron komemorasaun ami nia inan nian. Hotu tiha prepara jogos hamutuk tan kalan iha komunidade ami mak anima rekreiu.

Maske tempu oituan de’it maibé, haree katak ema hotu haksolok. Nune’e fiar katak Madre Mazzarello mos kontente ho nia oan sira ne’ebe hadomi Nia.

(Anita Freitas FMA)