Papa Francisco iha Angelus 5 Juñu2014

Maun no biin-alin sira, bondia!

Ohin ita selebra solenidade Santíssima Trindade, ne’ebé aprezenta mai ita-nia kontemplasaun no adorasaun moris divina Aman nian, Oan nian no Espíritu Santu nian: vida ida komuñaun no domin perfeitu nian, hun no rohan universu no kriatura tomak nian, Maromak. Iha Trindade, ita rekoñese mós modelu Kreda nian, ne’ebé ita simu bolun atu hadomi hanesan Jezús hadomi ita. Domin mak sinál konkretu ne’ebé hatudu fiar iha Maromak Aman, Oan no Espíritu Santu. Domin mak emblema sarani nian, hanesan Jezús dehan mai ita: “Nune’e ema hotu sei hatene katak imi ha’u-nia eskolante: se imi hadomi malu” (Jo 13,35). Kontradisaun ida atu hanoin iha sarani sira ne’ebé ódiu malu. Ne’e kontradisaun ida! No diabu buka beibeik buat ne’e: halo ita ódiu, tanba nia kuda nafatin ódiu: nia la koñese domin, domin mai husi Maromak!

Ita hotu simu bolun atu sasin no haklaken mensajen katak “Maromak mak domin”, katak Maromak la dook eh insensivel ba akontesimentu umanu sira. Nia besik, nia nafatin iha ita-nia sorin,la’o ho ita atu partilla ita-nia ksolok no ita-nia terus, ita-nia esperansa no ita-ni akolen sira. Nia hadomi tebes ita to’o halo AN ba ema, mai ih amundu la’ós atu tesi lia ba nia, maibé atu mundu hetan salvasaun liuhusi Jezús (kf Jo 3,16-17). Ne’e mak Maromak nia domin iha Jezús, ne’e mak domin ne’ebé la’ós fasil atu komprende, maibé ita sente bainhira ita hakbesik ba Jezús. No Nia perdua nafatin, Nia hein ita nafatin, Nia hadomi liu ita. No Jezús nia ne’ebé ita sente mak Maromak nia domin.

Espíritu Santu, don Jezús moris-hi’as nian, komunika mai ita vida divina no nune’e halo ita tama iha dinamizmu ida domin nian, komuñaun nian, servisu resíproku nian partilla nian. Ema ida ne’ebé hadomi ema seluk tanba ksolok hadomi nian nia mak reflesu Trindade nian. Família ida ne’ebé hadomi no tulun rma seluk mak reflesu ida Trindade nian. Parókia ida ne’ebé hakarak di’ak no partilla soin espirituál no materiál sira mak reflesu ida Trindade nian.

Domi loos la iha limite, maibé hatene limita an atu ba hasoru ema seluk, atu respeita ema seluk nia liberdade. Domingu-domingu ita bá Misa, ita selebra Eukaristia hamutuk no Eukaristia mak “ai-hun lakan” iha ne’ebé Trindade horik no komunika iha hariak an; tanba ne’e Kreda koloka festa Corpus Domini liutiha ida Trindade nian. Iha kinta mai, tuir tradisaun romana, ita selebra Santa Misa iha S. Giovanni Laterano no hafoin ita halo prosisaun ho Santíssimu Sakramentu. Ha’u konvida romanu no peregrinu atu partisipa hodi esprime ita-nia dezeju atu sia povu “halibur iha unidade Aman no Oan no Espiritu Santu nian” (S. Cipriano). Ha’u hein imi iha kinta mai, tuku 19H00, ba Misa no prosisaun Corpus Christi.

Virjen Maria, kriatura perfeita Trindade nian, tulun ita halo ita-nia moris tomak, iha jestu ki’ik no hilin importante liu sira, knananuk ida hahí nian ba Maromak domin.