Fatumaka – Iha 8 Fevereiru 2020, iha tuku 3:00 loraik  animadores  husi   Venilale, Fatumaka no Baucau, hala’o  enkontru formasaun zonál iha Fatumaka. Enkontru ida ne’e fó husi padre João Boavida SDB, ho tema Don Bosco nia polítika Ami Aman.

Enkontru hahú ho liafuan Bem-Vindo, padre konvida animadores sira atu aproveita didi’ak momentu formasaun ida ne’e, basa nu’udar anomador/a presiza hatudu uluk iha sira nia moris, sai sarani di’ak no sidadaun onestu hafoin mak  ba oratoriano sira.   Tuirmai padre aprezenta  estreia Reitor Mor nian ba tinan ida ne’e: SARANI DI’AK NO SIDADAUN ONESTU. Husi aprezentasaun haree oinsá Don Bosco nia tempu ho situasaun foin-sa’e sira nian ne’ebé iha perigu laran, labarik sira ne’ebé moris iha Estrada no buka servisu iha sidade ne’ebé ikus mai sira nia para fatin mak prizaun de’it. Maibé Don Bosco hateke ba situasaun ne’e ho perspetiva ne’ebé diferente: labarik sira ne’ebé moris iha estrada, iha posibilidade atu sai sarani di’ak sira, labarik sira iha kadeia Generala mak fini di’ak sira ne’ebé  forma didi’ak sei sai sidadaun onestu. Don Bosco nia polítika mak polítika ida ne’ebé la’ós buka kadeira, maibé bolu ita atu hatudu respeitu ba autoridade, moris tuir lei, halo di’ak ba foin-sa’e sira hodi salva sira nia klamar.

Hotu tiha aprezentasaun fahe iha grupu 10 no servisu grupu ho pergunta sira: oinsá imi haree iha ambiente ne’ebé imi hela ba Don Bosco nia espíritu sei iha ka lae? hafoin sharing no fahe iha asembleia. Tuirmai, Me. Lucia haforsa  liu tan animdores sira nia hanoin no halo konkluzaun badak hafoin taka ho orasaun, merenda hamutuk no fahe malu.

(Olviana-Abelita-Maria Natalina FMA)