Papa Francisco iha Angelus, 2 Fevereiru 2020

 

Maun no biin-alin sira, bondia!

Ohin ita selebra festa Aprezentasaun Na’i nian: bainhira Jezús foin moris Virjen Maria no S. José aprezenta Nia iha templu. Iha data  ida-ne’e akontese mós Loron vida konsagrada nian, ne’ebé fó hanoin ba rikusoin boot iha Kreda katak sira ne’ebé tuir Na’i besik liu hodi profesa konsellu evanjéliku sira.

Evanjellu (kf Lc 2,22-40) haktuir katak, loron haatnulu liutiha Jezús nia moris, Jezús nia inan-aman sira lori Kosok-Oan ba Jerusalém atu konsagra Nia ba Maromak, hanesan lei ebraika ordena. No enkuantu deskreve ritu ida husi tradisaun, epizódi ne’e tau iha ita-nia atensaun personajen ruma nia ezemplu. Ita hetan sira iha momentu sira halo esperiénsia enkontru nian ho Na’i iha fatin ne’ebé Nia halo nia An prezente no besik ba ema. Sira mak Maria no José, Simeão no Ana, ne’ebé reprezenta modelu akollimentu nian no saran an moris rasik nian ba Maromak. Sira na’in haat la hanesan, sira hotu diferente, maibé hotu-hotu buka Maromak no husik Na’i gia sira.

Evanjelista Lucas deskreve sira na’in haat ho atitude rua: atitude movimentu nian no atitude hakfodak nian.

Atitude dahuluk mak movimentu. Maria no José la’o ba Jerusalém; husi nia parte, Simeão, tanba Espíritu dudu nia, nia bá iha temple, enkuantu Ana serví Maromak loron no kalan la para. Ho modu ne’e protagonista na’in haat pasajen evanjélika nian hatudu mai ita katak moris sarani husu dinamizmu no husu disponibilidade atu la’o, hodi husik Espíritu Santu gia ita. Imobilidade la la’o hamutuk ho sasin sarani no ho misaun Kreda nian. Mundu presiza kristaun sira ne’ebé husik Espíritu book sira, ne’ebé la kole atu la’o iha dalan sira moris nian, atu lori ba ema hotu Jezús nia liafuan ne’ebé fó konsolasaun. Batizadu ida-idak simu vokasaun ba anúnsiu – anunsia buat ruma, anunsia Jezús –, vokasaun ba misaun evanjelizadora: anunsia Jezús! Parókia sira no komunidade ekleziál oioin simu bolun atu favorese foin-sa’e sira, família sira no katuas-ferik sira nia empeñu, atu ema hotu bele halo esperiénsia kristán, hodi moris nu’udar protagonista Kreda nia vida no misaun.

Atitude daruak ne’ebé S. Lucas uza hodi aprezenta personajen na’in haat narrasaun nian mak hakfodak. Maria no José hakfodak ho buat sira ne’ebé hateten kona-ba Nia [kona-ba Jezús]» (v. 33). Hakfodak mak reasaun esplísita husi katuas Simeão mós, ne’ebé iha Kosok-Oan Jezús nia haree ho matan salvasaun ne’ebé Maromak halo ba nia povu nia di’ak: salvasaun ne’ebé nia hein ba tinan barak. Buat hanesan vale ba Ana, ne’ebé «hahú mós hahí Maromak» (v. 38) no bá hatudu ba ema sira Jezús ne’e. Ida-ne’e mak santa ibun-boot ida, nia ko’alia barak kona-ba buat di’ak, la’ós buat aat. Nia dehan, nia haklaken: santa ida ne’ebé bá hasoru feto seluk halo sira haree Jezús. Figura fiar-na’in sira ne’e hakfodak, tanba sira husik eventu sira ne’ebé akontese iha sira nia matan, kapta no envolve sira. Kapasidade hakfodak nian ba akontesimentu sira ne’ebé hale’u ita favorese esperiénsia relijioza no halo sai fekundu enkontru ho Na’i. Oinseluk fali, inkapasidade atu hakfodak halo ita indiferente no haluan distánsia entre dalan fiar nian no moris loroloron nian. Maun no biin-alin sira, iha moimentu nafatin no husik ita-nia an nakloke ba hakfodak!

Atu Virjen Maria tulun ita kontempla loron ba loron Jezús, Maromak nia Don mai ita, no husik Nia envolve ita iha movimentu don nian, ho hafodak haksolok, atu ita nia moris sai hahí id aba Maromak iha serviu maun-alin sira-nian.