Venilale –  Loron 2 Fevereiru mak Loron Konsagradu sira-nian. Konsagradu sira mak batizadu hotu, basá bainhira ita sei kosok-oan ita-nia inan-aman no padriñu  no madriña sira lori ita ba aprezenta ba Maromak iha nia  Kreda.

Nu’udar batizadu ita sai mós nailulik, liurai no profeta. “Ó mak konsagradu ida, kose ho mina santu Krizma nian: hamutuk ho Kristu amlulik, liurai no profeta”.  Knaar sira ne’e bele haktuir liuhusi sai leitór/a, hodi “empresta lian ba Maromak”.

Tanba Kristu rasik mak ko’alia bainhira iha Kreda lee Eskritura, nune’e, ita empresta ita-nia lian ba Maromak; ita sai ninia ministru sira. Liuhusi ita-nia lian, Maromak halo nia Liafuan nalian!

Bainhira ita proklama pasajen Maromak nia Liafuan nian, ita sai kolaboradór/a Maromak nian ne’ebé hala’o nia obra salvasaun nian: Ita tenke konxiente katak proklama Liafuan la’ós atu  buat kmaan ida ka halo hanesan buat baibain ida!

Ida-ne’e mak ligasaun entre Loron vida konsagrada no atividade kompetisaun lee Maromak nia Liafuan ne’ebé halo iha koléjiu S. Maria Mazzarello, Venilale. Kompetisaun lee Maromak nia Liafuan mós atu kompleta Domingu Maromak nia Liafuan ne’ebé Domingu uluk selebra. Partisipante hamutuk na’in 20 mai husi turma área alimentar no hotelaria tinan dahuluk no daruak, na’in lima kada turma.

Objetivu husi kompetisaun ne’e mak atu prepara leitora sira ETV no koléjiu nian no mós atu tulun foin-sa’e sira oinsá lee Maromak nia Liafuan ne’ebé di’ak no dignu. Basá lee Maromak nia Liafuan, momentu hanesan ita haklaken uluk mai ita-nia an no hafoin haklaken ba ouvinte sira, atu ema seluk bele komprende saida mak ita lee no saida mak Maromak hato’o ba sira.

Ir Jacinta Gusmão prepara kritériu sira avaliasaun nian ne’ebé molok ne’e aprezenta tiha ona ba konkorrente sira.  Ir. Carolina Correia no Ir. Olviana Ina Kii mak sai juri ba kompetisaun ne’e.

Modalidade kompetisaun mak kada turma (na’in lima) simu ona leitura ne’ebé tenke lee. Hafoin sira hotu ba lee hodi haree sé mak lee di’ak ho valór aas atu tuir fali iha rodada daruak. Iha rodada daruak la’ós ona tuir turma maibé tuir ranking valór sira nian. Ikus husi kompetisaun ne’e na’in 3 mak sai manán-na’in: Nelia, Ediana no Izaulina. Partisipante hotu halo ho di’ak no sira ne’e mak sei sai animadora sira iha liturjia, liuliu nu’udar leitora ba Maromak nia Liafuan no salmista iha Santa Missa.

(Alice Filipe-JG)