Papa Francisco iha Regina Coeli, 8 Juñu 2014

 

Maun no biin-alin sira, bondia!

Festa Pentekostes nian komemora efuzaun Espíritu Santu ba Apóstolu sira halibur iha Senákulu. Hanesan Páskua, ne’e mak eventu ida akontese iha festa ebraika ida ne’ebé eziste antes, no lori ba kumprimentu surprendente ida. Livru Apóstolu sira nia Hahalok haktuir sinál no fuan sira husi efuzaun estraordinária ne’e: anin maka’as no ahi nanál lakan; ta’uk sai lakon no fó fatin ba barani; nanál sira kore no ema hotu komprende anúnsiu. Iha ne’ebé Maromak nia Espíritu to’o, buat hotu moris hikas no nakfilak. Eventu Pentekostes nian marka Kreda nia moris no ninia manifestasaun públika; no karakterístika rua dada ita-nia atensaun: Kreda ida ne’ebé surprende no perturba.

 

Elementu fundamentál ida Pentekostes nian mak surpreza. Ita-nia Maromak mak Maromak surpreza nian, ida-ne’e ita hatene. Ema ida la hein tan buat ida husi dixípulu sira: liutiha Jezús nia mate sira mak grupu oan ida insignifikante, oan-kiak sira ne’ebé lakon sira-nia Mestre. Afinál akontese eventu ida ne’ebé ema la hein no hamosu admirasaun: ema hakfodak tanba ida-idak rona dixípulu sira ko’alia iha sira-nia lian rasik, hodi haktuir Maromak nia obra boot sira (kf. At 2,6-7.11). Kreda ne’ebé moris iha Pentekostes mak komunidade ida ne’ebé hamosu admirasaun tanba, ho kbiit mai husi Maromak, nia haklaken mensajen foun ida – Kristu nia Resurreisaun – ho linguajen foun ida – ida universál domin nian. Anúnsiu foun ida: Kristu moris, Nia moris hi’as; linguajen foun ida: linguajen domin nian. Dixípulu sira hetan kbiit husi leten no ko’alia ho barani – minutu ruma molok sira hotu ta’uk-teen, maibé oras-ne’e sira ko’alia ho barani no frankeza, ho liberdade Espíritu Santu nian.

Kreda simu bolun atu sai nafatin nune’e: ho kbiit atu surprende hodi haklaken ba ema hotu katak Jezús Kristu manán mate, katak Maromak nia liman nakloke nafatin, katak Ninia pasiénsia nafatin iha-ne’ebá atu hein ita atu kura ita, atu perdua ita. Ba misaun ida-ne’e mak Jezús haraik Ninia Espíritu ba Kreda.

Atensaun: se Kreda moris, nia tenke surprende nafatin. Surprende mak karakterístika Kreda ida moris nian. Kreda ida ne’ebé la iha kapasidade atu surprende mak Kreda fraku, moras, atu mate no tenke lori lalais ba baixa iha unidade kura intensiva [ICU]!

Ema ruma, iha Jerusalém, hakarak atu Jezús nia dixípulu sira, blokadu tan ta’uk, hela nafatin taka an iha uma-laran atu la kria perturbasaun. Ohin loron mós barak mak hakarak buat ne’e husi sarani sira. Na’i ne’ebé moris-hi’as fali dudu sira ba mundu: «Hanesan Aman haruka Ha’u, Ha’u mós haruka imi» (Jo 20,21). Kreda Pentekostes nian mak Kreda ida ne’ebé la rezigna an atu sai mamar, “destilada” [sai uitoan-uitoan] demais. Lae, labele rezigna an ba buat ne’e! Kreda lakohi sai elementu dekorativu. Kreda ne’ebé la ta’uk atu sai ba li’ur, hasoru ema, atu haklaken mensajen ne’ebé entrega ba nia, maski mensajen ne’e disturba eh halo konxiénsia sira la hakmatek, maski mensajen ne’e karik no mós dala ruma, lori ba martíriu. Kreda moris mai ida no universál, ho identidade presiza ida, maibé nakloke, Kreda ida ne’ebé hakohak mundu maibé la kesi metin nian; husik nia livre, maibé hakohak nia hanesan koluna sira Prasa ne’e nian: liman rua ne’ebé lolo hodi hakohak, maibé la taka an atu kaer metin. Ita sarani sira ema livre, no Kreda hakarak ita livre!

Ita hateke ba Virjen Maria, ne’ebé iha dadeersaan Pentekostes nian hela iha Senákulu, Inan ne’ebé hela ho nia oan sira. Iha nia kbiit Espíritu Santu nian halo “buat kmanek” oioin (Lc 1,49). Nia rasik mak dehan. Nia, Makso’ik nia Inan no Kreda nia Inan, obtein ho ninia intersesaun efuzaun foun ida Espíritu Maromak nian ba Kreda no ba mundu.